„ნაციონალური მოძრაობის“ ერთ-ერთი ლიდერი სალომე სამადაშვილი პარტიის გადაწყვეტილებას, რომლის თანახმადაც ენმ-მ ადგილობრივი თვითმმართველობის არჩევნების მეორე ტურში მონაწილეობაზე უარი თქვა, შეცდომად მიიჩნევს.
როგორც სამადაშვილმა „ფეისბუქის“ პირად გვერდზე დაწერა, აღნიშნული გადაწყვეტილება ხელიდან გაშვებული პოლიტიკური შესაძლებლობაა.
„ვფიქრობ, ენმ-ის პოლიტიკური საბჭო შეცდა, როდესაც დღეს ქუთაისსა და მარტვილში მეორე ტურზე, თუნდაც უსამართლო პირობებში, ბრძოლა დათმო. სამწუხაროდ, მე უმცირესობაში აღმოვჩნდი. პარტიის მთელი რესურსი უნდა მიგვემართა მეორე ტურზე. გაყალბების ლუსტრაციასაც უკეთ მოვახდენდით. ხელიდან გაშვებული პოლიტიკური შესაძლებლობაა. პარტიის ინტერესებიდან გამომდინარე, იმედია, უმრავლესობის პოზიცია სწორი აღმოჩნდება, რასაც მხოლოდ მომავალი გვაჩვენებს“,- აცხადებს სალომე სამადაშვილი.