პარლამენტის იურიდიულ საკითხთა კომიტეტის თავმჯდომარის, ეკა ბესელიას განცხადებით, მეგის ქარდავას ქართული მართლმსაჯულება ელოდება, რადგან მას უმძიმესი ბრალდებები აქვს წაყენებული.
როგორც ჟურნალისტებს ბესელიამ განუცხადა, ქარდავას მიმართ განსაკუთრებით მძიმეა ბრალდებები, რომელიც ეხება თეთრაძის საქმესა და სამალავებში აღმოჩენილი წამების ამსახველ მასალებს.
“მის მიმართ ყველა პროცედურა კანონის სრული დაცვით განხორციელდება. გჯერათ, რომ სააკაშვილი ქარდავას არ იცნობდა? შეიძლება, ქვეყანაში ასეთი სისტემური დანაშაული ისე ხდებოდეს, რომ ქვეყნის პირველმა პირმა არ იცოდეს? სააკაშვილისთვის რომელი ვერსია უფრო სჯობს, ის რომ როგორც პრეზიდენტმა არ იცოდა, ქვეყანაში რა ხდებოდა, თუ ის, რომ პოლიტიკური სისტემა იყო, რომლის სათავეშიც თვითონ იდგა? – სააკაშვილი პასუხისმგებლობას ვერც ერთ შემთხვევაში ვერ აირიდებს“, – განაცხადა ბესელიამ.
თავდაცვის სამინისტროს სამხედრო პოლიციის დეპარტამენტის ყოფილი უფროსი მეგის ქარდავა კიევში 1-ელ ნოემბერს დააკავეს. მისი დაკავების შესახებ ინფორმაცია დღეს ოფიციალურად დაადასტურა საქართველოს პროკურატურამ. ამასთან, საქართველოს ყოფილმა პრეზიდენტმა მიხეილ სააკაშვილმა “ფეისბუქის” გვერდზე დაწერა, რომ მეგის ქარდავას არასდროს შეხვედრია და მისი არსებობის შესახებ მხოლოდ პრესიდან იცის.