ქიმიური, ბიოლოგიური, რადიაციული და ბირთვული (ქბრბ) უსაფრთხოების საკითხებზე დონორთა საკოორდინაციო შეხვედრაზე საქართველოში საფრანგეთის, შვედეთის, იტალიის ელჩებმა და ევროკავშირის წარმომადგენლობის თანამშრომლობის და განვითარების განყოფილების უფროსმა სუს-თან თანამშრომლობაზე ისაუბრეს. ამის შესახებ საქართველოს სახელმწიფო უსაფრთხოების სამსახური იტყობინება.
საფრანგეთის ელჩმა საქართველოში, პასკალ მენიემ განაცხადა, რომ საფრანგეთს საქართველოს სახელმწიფო უსაფრთხოების სამსახურთან ძალიან ძლიერი თანამშრომლობა აქვს.
„ძალიან ინფორმაციული კონფერენცია იყო და საგრძნობლად აამაღლა საქართველოს პროფილი სამოქმედო გეგმის იმპლემენტაციის თვალსაზრისით, რომელიც გაეროს მიერ აღიარებულია, როგორც ერთ-ერთი საუკეთესო ქბრბ საფრთხეების წინააღმდეგ ბრძოლის სტაბილურობის ინსტრუმენტის წევრ ქვეყანათა შორის. საფრანგეთს აქვს ძალიან მტკიცე ურთიერთობა საქართველოსთან და აქვს ძალიან ძლიერი თანამშრომლობა საქართველოს სახელმწიფო უსაფრთხოების სამსახურთან იმიტომ, რომ ჩვენ ვართ დაინტერესებული ტერორიზმის წინააღმდეგ ბრძოლის კუთხით, ორგანიზებული დანაშაულის წინააღმდეგ ბრძოლის, ბირთვული იარაღის გაუვრცელებლობის და ქბრბ საფრთხეების წინააღმდეგ ბრძოლის მიმართულებით. ამ მხრივ, შემიძლია ვთქვა, რომ საქართველო და საფრანგეთი მხარდამხარ არიან. ჩვენ ძალიან ბედნიერები ვართ ჩვენი ნაყოფიერი თანამშრომლობით“, – განაცხადა პასკალ მენიემ.
როგორც შვედეთის ელჩმა საქართველოში მარტინა ქვიქმა განაცხადა, საქართველოს დიდი წვლილი მიუძღვის საერთაშორისო თანამშრომლობის მიმართულებით.
„საქართველომ უდიდეს პროგრესს მიაღწია ბოლო ათი წლის განმავლობაში. მე მინდა მივულოცო ქართველებს, რაც მათ უკვე გააკეთეს საერთაშორისო თანამშრომლობის კუთხით. დღეს ითქვა, რომ ამ საფრთხეებს არ აქვს ეროვნული საზღვრები და ეს ნამდვილად ასეა. საერთაშორისო თანამშრომლობა ძალიან მნიშვნელოვანია და საქართველოს დიდი წვლილი აქვს ამ მიმართულებით“, – განაცხადა მარტინა ქვიქმა.
საქართველოში ევროკავშირის წარმომადგენლობის თანამშრომლობის და განვითარების განყოფილების უფროსის, ვინსენტ რეის თქმით, საქართველოს წინსვლას მოწმობს ის ფაქტი, რომ მსოფლიოს მასშტაბით ,ევროკავშირის წარმომადგენლობის მხოლოდ რამდენიმე რეგიონალური სამდივნო არსებობს და ერთ-ერთი მათგანი საქართველოშია.
„საქართველო წამყვანი ქვეყანაა ჩვენს ერთობლივ თანამშრომლობაში. მსოფლიოს მასშტაბით, არსებობს მხოლოდ რამდენიმე რეგიონალური სამდივნო და ერთ-ერთი მათგანი სწორედ საქართველოშია, რომელიც ფარავს არა მხოლოდ თქვენს ქვეყანას, არამედ რეგიონის უფრო ფართო არეალს. ჩვენ საქართველოს გვერდში ვუდგავართ იმისთვის, რომ განვავითაროთ ქვეყნის ექსპერტული გამოცდილება, რათა გახდეს ერთ-ერთი ცენტრალური ქვეყანა, მხარდაჭერით უზრუნველყოფის კუთხით“, – განაცხადა ვინსენტ რეიმ.
საქართველოში იტალიის ელჩმა, ანტონიო ენრიკო ბარტოლიმ მიმდინარე წელს დაგეგმილ გლობალური პარტნიორობის შეხვედრაზე და ამ შეხვედრაში საქართველოს მონაწილეობის მნიშვნელობაზე ისაუბრა.
„უნდა აღინიშნოს საქართველოს ძალისხმევა ქბრბ სტრატეგიის ჩამოყალიბების და ეფექტური იმპლემენტაციის კუთხით. დღევანდელი შეხვედრა ნათლად წარმოაჩენს უწყებათაშორის მიდგომას და საერთაშორისო თანამშრომლობას, რადგან წარმოდგენილია საქართველოს მთელი რიგი სამინისტრო და უწყება და ასევე საერთაშორისო ორგანიზაცია. ჩვენ ყოველთვის ჩართული ვართ ქბრბ უსაფრთხოების პროცესში. წელს ჩვენ ვართ G7-ის და გლობალური პარტნიორობის განხორციელების თავმჯდომარე ქვეყანა და 15-17 ნოემბერს რომში, ვაპირებთ, გავმართოთ გლობალური პარტნიორობის შეხვედრა, მიმდინარე წლის დასკვნითი შეხვედრა და ეს იქნება ყველაზე ღირებული შესაძლებლობა საქართველოსთვის, წარადგინოს გეგმა და მიმოიხილოს ყველა პროგრამა იმისთვის, რომ დონორებმა შეისწავლონ ფინანსურად, სხვადასხვა მიმართულებებით“, – განაცხადა ანტონიო ენრიკო ბარტოლიმ.
ღონისძიება საქართველოს სახელმწიფო უსაფრთხოების სამსახურის ორგანიზებითა და ევროკავშირის ფინანსური მხარდაჭერით ჩატარდა.