წინა ხელისუფლების მაღალჩინოსნების საქმეები აბსოლუტურად გასულია პოლიტიკური პროცესებიდან, – ამის შესახებ ჟურნალისტებს “ქართული ოცნების” დეპუტატმა ირაკლი სესიაშვილმა განუცხადა. სესიაშვილის თქმით, შს ყოფილი მინისტრის ვანო მერაბიშვილის საქმე სამართლებრივი საკითხია.
“ამაზე სტრასბურგის სასამართლომ უნდა იმსჯელოს და სასამართლოს შესაბამისი გადაწყვეტილების მიხედვით იმოქმედოს სახელმწიფომ”, – აღნიშნა სესიაშვილმა.
ვანო მერაბიშვილის საქმეზე სტრასბურგის სასამართლო გადაწყვეტილებას დღეს გამოაცხადებს.
ევროსასამართლოს 14 ივნისის გადაწყვეტილებით, სტრასბურგის სასამართლოს პალატამ, 7 მოსამართლის შემადგენლობით, ერთხმად დაადგინა, რომ ივანე მერაბიშვილის წინასწარი პატიმრობა იყო კანონიერი, თუმცა გაჩნდა კითხვის ნიშანი 2013 წლის 14 დეკემბერს მერაბიშვილის საკნიდან სავარაუდო გაყვანის ეპიზოდთან დაკავშირებით, რასაც არ დაეთანხმა საქართველოს იუსტიციის სამინისტრო და 2016 წლის 13 სექტემბერს ეს გადაწყვეტილება დიდ პალატაში გაასაჩივრა.