მე არასოდეს არ ვუჭერდი მხარს ეგრეთ წოდებულ სააკაშვილს ფრთას, რომელიც ჩვენი ხელისუფლების დროს არსებობდა, – ამის შესახებ ნათქვამია ყოფილი პრემიერ-მინისტრის, ვანო მერაბიშვილის განცხადებაში, რომელიც ვრცელდება:
“მოგესალმებით მეგობრებო. პირველ რიგში მინდა აღვნიშნო რომ ჩემთვის ამ განცხადების გავრცელება მარტივი არ არის და მთელი ამ წლების განმავლობაში, რომელიც ციხეში გავატარე “ქართული ოცნების” პოლიტიკური დაკვეთის შედეგად, ბევრჯერ მიფიქრია ამ საკითხზე და ვფიქრობ, რომ ახლა სწორედ ის დროა, როდესაც დუმილი უნდა დავარღვიო.
პირველ რიგში, მინდა მოგახსენოთ, რომ მე არასოდეს არ ვუჭერდი მხარს ეგრეთ წოდებულ სააკაშვილს ფრთას, რომელიც ჩვენი ხელისუფლების დროს არსებობდა. ჩვენ – ანუ მე, გიგა ბოკერია, გიგი უგულავა და ლევან რამიშვილი, “თავისუფლების ინსტიტუტიდან” მოვდივართ ერთად და საკმაოდ დიდი ხნის თანამებრძოლები ვართ, ხოლო ე.წ “სააკაშვილის ფრთას” მას შემდეგ დავუმეგობრდით, რაც ნაციონალური მოძრაობა ჩამოყალიბდა. ასე, რომ ჩვენი მეგობრობა რეალური არასოდეს ყოფილა და ის მხოლოდ თანამდებობებით და პოლიტიკური ინტერესებით შემოიფარგლებოდა.
მე მსურს განვაცხადო, რომ ვნანობ 7 ნოემბრის აქციის დარბევაში თანამონაწილეობას, ხაზს ვუსვამ, თანამონაწილეობას, ვინაიდან მე მხოლოდ დავალების შემსრულებელი ვიყავი, დავალება კი მიხეილ სააკაშვილისგან მოდიოდა.
არამც და არამც არ ვნანობ, 26 მაისის აქციის დარბევას, ვინაიდან მაშინ ჩვენ ვებრძოდით რეალურად რუსეთს, მაგრამ ბოდიშს ვუხდი უბრალო ხალხს, რომელიც გულუბრყვილოდ ენდო იმდროინდელ პოლიტიკურ ლიდერშიფს და მათ გამო ზედმეტად მკაცრად დაისაჯა, თუმცა კიდევ ვიმეორებ რომ მე ვერ დავუშვებდი, რუსეთიდან მართული ქალბატონი ბურჯანაძის მიერ საქართველოს დამოუკიდებლობის დღის ჩაშლას.
ასევე ძალიან ვნანობ ვალერი გელაშვილის საქმეში თანამონაწილეობას, ცხადია, ესეც იმ დროინდელი პრეზიდენტის, სააკაშვილის მხრიდან მოდიოდა, მას არ დაუკვეთია მკვლელობა, მან მე და ერეკლე კოდუას დაგვიკვეთა ვალერი გელაშვილის იმ დღეში ჩაგდება, რაშიც საბოლოოდ აღმოჩნდა. პიროვნული სიმპათიები გელაშვილის მიმართ არ გამაჩნდა და არ გამაჩნია რიგი მიზეზების გამო, მაგრამ ადამიანურად, მასაც ბოდიშს ვუხდი.
მე მზად ვარ ვითანამშროლო გამოძიებასთან, მივუთითო გამოძიებას იმასთან დაკავშირებით თუ რა ტიპის დავალებებს გასცემდა პრეზიდენტი სააკაშვილი.
მე უარს ვაცხადებ ერთიანი ნაციონალური მოძრაობის წევრობაზე და ვტოვებ პარტიას.
მადლობას გიხდით ყურადღებისთვის,ვთვლი რომ დღეს ჩემს ქვეყანას აუცილებლად ჭირდება სიმართლე და მეც, მხოლოდ რეალურ ფაქტებზე ვისაუბრებ“.
ვანო მერაბიშვილი