უმრავლესობის წარმომადგენელი მამუკა მდინარაძე მიხეილ სააკაშვილის მიმართ გამამტყუნებელ განაჩენზე ოპონენტებისა და პრეზიდენტის მიერ გაკეთებულ განცხადებებს გამაოგნებელს უწოდებს.
როგორც მდინარაძემ ჟურნალისტებს განუცხადა, განსაკუთრებულად გამაოგნებელია, როდესაც განაჩენს აკრიტიკებენ იურისტები. მისი თქმით, სააკაშვილს მსჯავრი არა პატიმრების შეწყალებისთვის, არამედ უფლებამოსილების ბოროტად გამოყენებისთვის დაედო.
„იცავენ მიხეილ სააკაშვილს, რომელიც იდგა იმ დანაშაულებრივი სისტემის სათავეში, რომელმაც სცადა, გირგვლიანის საქმე ჩაეფარცხა და ამ კომენტარებით უპირისპირდებიან როგორც ქართული სასამართლოს, ასევე ევროპული სასამართლოს გადაწყვეტილებას, რომელმაც თავის დროზე თქვა, რომ გაოგნებულია იმ სისტემური დანაშაულით – მათ შორის შეწყალებაზეც იყო საუბარი, რომელიც მოხდა საქართველოში“, – განაცხადა მამუკა მდინარაძემ.
მისი თქმით, აბსოლუტურად არასწორი ინტერპრეტაციაა, თითქოს „ვიღაც პრეზიდენტს ასამართლებს შეწყალების გამოყენების გამო“.
„რეალურად, საქმე გვაქვს უფლებამოსილების ბოროტად გამოყენებასთან. იმ ლოგიკას რომ გავყვეთ, რომელსაც ჩვენი ოპონენტები ავითარებენ, გამოდის, რომ მაგალითად, თუ პრეზიდენტმა აიღო ქრთამი და ამის სანაცვლოდ შეიწყალა კონკრეტული მსჯავრდებული, ეს არ უნდა ჩაითვალოს დანაშაულად. ეს არის აბსოლუტურად არასწორი ინტერპრეტირება“, – განაცხადა მამუკა მდინარაძემ.