ხორავას ქუჩაზე ორი მოსწავლის მკვლელობაში ბრალდებული ერთ-ერთი არასრულწლოვნის ადვოკატი ეკა მაჭარაშვილი სამედიცინო ექსპერტიზაზე დაყრდნობით ამბობს, რომ გარდაცვლილს მიყენებული აქვს იმაზე მეტი ჭრილობა და განსხვავებული ზომის, ვიდრე ეს საქმეშია წარმოდგენილი. ინფორმაციას “ლიბერალი” ავრცელებს.
“სასამართლო-სამედიცინო ექსპერტიზის დასკვნით დასტურდება ის ფაქტი, რომ გარდაცვლილს მიყენებული აქვს იმაზე მეტი ჭრილობა და განსხვავებული ზომის, ვიდრე ეს საქმეშია წარმოდგენილი. ჩვენ ვადასტურებთ, რომ გამოძიება არ არის ეფექტიანად ჩატარებული და ძალიან ბევრი კითხვები გვაქვს“, – თქვა ეკა მაჭარაშვილმა.
თბილისის საქალაქო სასამართლოში ხორავას ქუჩაზე ორი მოსწავლის მკვლელობაში ბრალდებული არასრულწლოვნების პროცესი მიმდინარეობს.
როგორც პროცესის დაწყებამდე ერთ-ერთი ბრალდებული არასრულწლოვნის ადვოკატმა ტარიელ კაკაბაძემ თქვა, საქმეში, სავარაუდოდ, იმაზე მეტი დანა ფიგურირებს, ვიდრე ბრალდების მხარე ამბობს. ადვოკატის თქმით, ამ კითხვას დამოუკიდებელი ექსპერტიზა გასცემს პასუხს, რომელიც უკვე დაწყებულია.
1 დეკემბერს თბილისის ცენტრში, ვერაზე ორი არასრულწლოვანი დაჭრეს. ერთი მოზარდი საავადმყოფოში მიყვანამდე გარდაიცვალა. 2 დეკემბერს მეორე მოზარდიც გარდაიცვალა.
შინაგან საქმეთა სამინისტროს ინფორმაციით, ხორავას ქუჩაზე მომხდარი ინციდენტის გამო 2001 წელს დაბადებული პირი განზრახ მკვლელობის ბრალდებით 2 დეკემბერს დააკავეს. მანამდე, პროკურატურამ ამ დანაშაულისთვის ორი პირი პასუხისგებაში მისცა. 4 დეკემბერს კი, სასამართლომ მათ პატიმრობა შეუფარდა.