თბილისის საკრებულოში სხდომა გაიმართა, რომელზეც მერიაში დაგეგმილი სტრუქტურულ რეფორმაზე იმსჯელეს.
სხდომაზე საკრებულოს განათლებისა და კულტურის კომისიის თავმჯდომარემ თამარ ტალიაშვილმა დაგეგმილ ცვლილებებთან დაკავშირებით ისაუბრა და ოპოზიციის კრიტიკას უპასუხა.
”მერიაში დაგეგმილი ცვლილებები საშუალებას იძლევა, მივიღოთ უფრო ეფექტიანი და მოქნილი მუნიციპალიტეტი. როდის აქეთ არის ის, რომ საქმიანი პროცესების ეფექტიანობის, მომსახურებისა და პროექტების ხარისხისა და მოცულობის გაზრდა საბიუჯეტო ხარჯების გაზრდის გარეშე არ წარმოადგენს ოპტიმიზაციას. თუ რომელიმე ძალისთვის ოპტიმიზაცია მაინც და მაინც ადამიანების სამსახურებიდან გათავისუფლებაა, ეს მათი ვიწრო პარტიული გაგება და განწყობის საგანია. დაგეგმილი ცვლილებები, სწორედაც რომ კიდევ უფრო მეტად დააახლოებს მოქალაქესა და მუნიციპალიტეტს, გაუადვილებს მოქალაქეებს მუნიციპალურ სერვისებზე წვდომას. რაც შეეხება, უშუალოდ კულტურის, განათლებისა და სპორტის მიმართულებით დაგეგმილ რესტრუქტურიზაციას, მინდა შევახსენო საზოგადოებას განათლებისა და კულტურის კომისიის ადრე არაერთხელ გაჟღერებული პოზიცია, რომ ჩვენ არ მივესალმებოდით კულტურისა და განათლების სამსახურების ცალ-ცალკე არსებობას. მოგეხსენებათ, რომ გაერო-ს გლობალური მდგრადი განვითარების მიზნების მიღწევაში, განსაკუთრებით განათლების ხარისხის გაუმჯობესებაში, უმნიშვნელოვანეს როლი ენიჭება კულტურას. დაგეგმილი რეფორმა ხელს შეუწყობს მერიის დაქვემდებარებული კულტურის-საგანმანათლებლო ინფრასტრუქტურის განვითარებას, მათ შორის მოსწავლე-ახალგაზრდობის სახლების, სახელოვნებო სკოლების, ბიბლიოთეკების ეფექტურ მართვასა და მოდერნიზებას, ახალი მრავალპროფილური ცენტრებისა და სივრცეების შექმნას. ერთგვაროვანი, ჰოლისტური მიდგომით უფრო ეფექტურად განხორციელდება ეს ამოცანები. ჩემთვის, როგორც მაჟორიტარი დეპუტატისთვის, რომელიც მოსახლეობას დაპირდა, რომ მაქსიმალურად იზრუნებს რაიონის პოტენციალის გამოვლენასა და ათვისებაზე მათ შორის ზღვის უბნის განვითარების ფორუმის ფორმატში, ძალიან მნიშვნელოვანია, რომ სტრუქტურული რეფორმის შედეგად გამგებლის ერთ-ერთი მოადგილე იქნება განვითარების მიმართულების კურატორი და იმუშავებს მათ შორის ეკონომიკური განვითარების საინვესტიციო პოლიტიკის და ეკონომიკური ინფრასტრუქტურის განვითარების პროგრამების დაგეგმვასა და განხორციელებაზე”, – განაცხადა ტალიაშვილმა.