პოლიტოლოგი რამაზ საყვარელიძე კომპრომატებით ომს გარკვეულ დონეზე დასაშვებად მიიჩნევს და მას ნორმალურ მოვლენად აფასებს.
ამის შესახებ საყვარელიძემ გაზეთ „ახალ თაობასთან“ ინტერვიუში განაცხადა.
„კომპრომატების ომი ჰაერიდან მოტანილი ტერმინი არ არის და ყველა ძალა მეტ-ნაკლებად იყენებს ხოლმე ამას ნებისმიერ ქვეყანაში. ყალბი კომპრომატია ცოდვა, თორემ თუ რაიმე მაკომპრომეტებელი არის ოპონენტზე, ის უნდა გამოქვეყნდეს, რომ მოსახლეობა კარგად იცნობდეს თავის ჩრდილოვანი მხარითაც და ღია მხარითაც იმას, ვისთვისაც აპირებს ხმის მიცემას.
წინასაარჩევნოდ კომპრომატების ომი აუცილებელიც კია იმისთვის, რომ დემოკრატიული პრინციპი განხორციელდეს. საზოგადოებს ჰქონდეს სრული ინფორმაცია ამა თუ იმ პოლიტიკურ პარტიაზე. ამ კომპრომატს ყველა პარტია გამოიყენებს. დაე, დაიდოს ყველა კომპრომატი, რაც კი არსებობს და მერე შეაფასოს საზოგადოებამ ამის მიხედვით საკუთარი არჩევანი.
ამ პროცესს ველოდები, არ გამოვრიცხავ და არც დიდ ცოდვად მიმაჩნია, იმიტომ, რომ ეს დემოკრატიის მოვლენაა.
თუმცა, ალბათ ისეთი რადიკალური მოულოდნელობა, როგორიც იყო ციხის კადრები, მეეჭვება იყოს. ველოდები იმასაც, რომ კომპრომატების ომს „ნაციონალური მოძრაობაც“ მოკიდებს ხელს და ვნახოთ, იმათ რა ფაქტები ექნებათ. ჯერჯერობით ის ფაქტები, რითაც ისინი აწარმოებენ ამ ომს, დიდად დამაჯერებელი არაა“ – აცხადებს საყვარელიძე.
