საქართველოს პრემიერ-მინისტრი გიორგი კვირიკაშვილი ბიბზნესასოციაციის წევრებს ხვდება, რომელზეც ბიზნეს კვლევას – “საქართველოს ბიზნესგარემო კერძო სექტორის თვალით” პრეზენტაციას წარადგენს.
შეხვედრის დასაწყისში პრემიერ-მინისტრმა გასული წლის მაკროეკონომიკურ მაჩვენებლებზე ისაუბრა და აღნიშნა, რომ 2017 წელი მთლიანობაში, დაგეგმილზე მაღალი პარამეტრებით, საკმაოდ წარმატებულად დაიხურა.
“ზრდის მაჩვენებლები იყო დაგეგმილზე მაღალი, როგორც მთლიანი შიდა პროდუქტის ზრდის, ასევე საერთაშორისო ვაჭრობის მიმართულებით; მნიშვნელოვნად გაიზარდა ექსპორტის მაჩვენებლები და სუვერენული ბალანსი ძალიან გაჯანსაღდა. თავისუფალი ბიუჯეტის ინდექსით ჩვენ, მსოფლიოს 100-ზე მეტ ქვეყანას შორის, ხუთეულში შევედით და ვფიქრობ, ეს ნამდვილად მოსალოცია”, – განაცხადა პრემიერ-მინისტრმა.
მთავრობის მეთაურმა ბიზნესის წარმომადგენლებს ასევე წარუდგინა ახალი ბიზნესომბუდსმენი ირაკლი ლექვინაძე, ხაზი გაუსვა მის გამოცდილებას ბიზნესსუბიექტებთან ურთიერთობაში და ბიზნესის წარმომადგენლებს მასთან კომუნიკაციაში მაქსიმალური გულწრფლობისა და გახსნილობისკენ მოუწოდა.