“საკმაოდ ამბიციური გეგმა გვაქვს – გავხადოთ ქართული პოლიცია კიდევ უფრო ეფექტიანი”

შინაგან საქმეთა სამინისტროში გვაქვს საკმაოდ ამბიციური გეგმა – გავხადოთ ქართული პოლიცია კიდევ უფრო ეფექტიანი, – ამის შესახებ შინაგან საქმეთა მინისტრმა გიორგი გახარიამ განაცხადა, სადაც უწყებას ახალი ავტომობილები გადაეცა.

როგორც შინაგან საქმეთა მინისტრმა აღნიშნა, ამ მიზნის მისაღწევად შსს აქვს კონკრეტული გეგმა, რომელიც ითვალისწინებს, მათ შორის, საპატრულო პოლიციის შემდგომ რეფორმირებას, კრიმინალური პოლიციის კომპლექსურ რეფორმას და საზღვრის ინტეგრირებულ მართვას. 

„ამ რეფორმების გარკვეული ნაწილი უკვე დაწყებულია, მათ შორის, დღეს შეგვიძლია ვთქვათ, რომ საპატრულო პოლიციაში სტრუქტურული რეფორმებისთვის პირველი ნაბიჯები უკვე გადადგმულია და თბილისის მთავარ სამმართველოში გამოყოფილია 5 ტერიტორიული სამმართველო, რომელთა გამოყოფამაც კიდევ უფრო გაზარდა მართვის ხარისხი და ოპერატიული რეაგირების სისწრაფე. ამასთან ერთად მინდა აღვნიშნო, რომ დღეს საპატრულო პოლიციას სამართავად გადაეცა უკონტაქტო პატრული და რაც მთავარია, თბილისის ქუჩებში იზრდება ქვეითი პატრულ-ინსპექტორების რაოდენობა“, – განაცხადა გახარიამ.