გიორგი მღებრიშვილის განცხადებით, მისი შს მინისტრობის დროს დეტალური სტატისტიკის პრეზენტაცია 2017 წელს განხორციელდა, რაზეც ინფორმაცია საქსტატსაც მიეწოდა.
„შემიძლია გითხრათ ის, რომ 2017 წლის დასაწყისში, მგონი თქვენს არქივებშიც მოგეპოვებათ მასალა, ჩვენ ფართომასშტაბიანი პრეზენტაცია გავაკეთეთ, სადაც მოწვეული იყო მედია და არასამთავრობო ორგანიზაციები და დეტალური, მუხლობრივად ჩაშლილი სტატისტიკა წარმოვადგინეთ. ეს არ იყო გამოქვეყნება, ეს იყო პრეზენტაცია. ამის შემდგომ და მანამდეც, სამ თვეში ერთხელ საქსტატს სრული ინფორმაცია მიეწოდებოდა და საქსტატი თავის ვებგვერდზე შესაბამისად ამ ინფორმაციას აქვეყნებდა. ასე, რომ საზოგადოების ნებისმიერი წევრისთვის ხელმისაწვდომი იყო ეს ინფორმაცია და საზოგადოებას ამ კუთხით შიმშილი არ უგრძვნია“, – განაცხადა გიორგი მღებრიშვილმა.
ამასთან, ჟურნალისტის კითხვაზე, თუ რა ურთიერთობა აქვს შინაგან საქმეთა ახალ მინისტრთან, გიორგი მღებრიშვილის განმარტებით, გიორგი გახარიასთან კარგი ურთიერთობა აქვს.
„რაც შეეხება შსს მინისტრსა და ჩემს ურთიერთობას, მინდა გითხრათ, რომ გადასარევი ურთიერთობა გვაქვს, მეგობრები ვართ და მეგობრები ვიქნებით მომავალშიც“, – განაცხადა გიორგი მღებრიშვილმა.