ჩვენ ვიქნებით ძალიან მკაცრები, შესაბამისად, მივიღეთ გადაწყვეტილება, რომ მომავალში კიდევ უფრო გამკაცრდება სატენდერო თუ ტექნიკური ზედამხედველობის კრიტერიუმები, – ამის შესახებ ჟურნალისტებს გაერთიანებული კომისიების სხდომის დასრულების შემდეგ თბილისის საკრებულოს თავმჯდომარემ გიორგი ტყემალაძემ განუცხადა.
მისი თქმით, თუ გამოიკვეთება კონკრეტული პასუხისმგებელი პირები, მათ კითხვა უნდა გასცენ ყველა არსებულ კითხვას. ტყემალაძის განცხადებით, თბილისის საკრებულო აქტიურად იმუშავებს იმ კუთხით, რომ სამომავლოდ მოქალაქეების უსაფრთხოება იყოს დაცული. მან დღევანდელი შეხვედრა ნაყოფიერად შეაფასა.
„ჩვენ ყველანი ვთანხმდებით, რომ იმ შემთხვევაში თუ გამოიკვეთება გარკვეული პასუხისმგებელი პირები, ყველამ უნდა გასცეს პასუხი შესაბამის კითხვას. ჩვენ ვიქნებით ძალიან მკაცრები, შესაბამისად, ასევე მივიღეთ გარკვეული ინფორმაცია და მიღებულია გადაწყვეტილება, რომ მომავალში კიდევ უფრო უნდა დავხვეწოთ კრიტერიუმები, რომლითაც კიდევ უფრო გამკაცრდება სატენდერო თუ ტექნიკური ზედამხედველობის კრიტერიუმები”, – განაცხადა გიორგი ტყემალაძემ.