თბილისის საკრებულოს უმრავლესობის წევრი ვახტანგ შაქარიშვილი „ერთიანი ნაციონალური მოძრაობის“ მიერ საკრებულოს რიგგარეშე სხდომის ჩატარების მოთხოვნას ეხმაურება და ”პოლიტიკურ წარმოდგენად” აფასებს. მისი განცხადებით, ვისაც მეტროს სადგურ „ვარკეთილში“ მომხდარ შემთხვევასთან დაკავშირებით კითხვები ჰქონდა, საკითხის განხილვაში მონაწილეობის და პასუხების მიღების საშუალება პარასკევს გამართულ ორი კომისიის გაერთიანებულ სხდომაზე მიეცა.
„კომისიების გაერთიანებულ სხდომაზე ჩვენც და უმრავლესობის წევრებმაც ძალიან მწვავე კითხვები დავსვით. ამ განხილვაში ოპოზიციის ერთმა ნაწილმა, „ევროპულმა საქართველომ“ მიიღო მონაწილეობა. მათ საშუალება ჰქონდათ, კითხვები დაესვათ და მერიის მაღალჩინოსნებმა, შესაბამისი სამსახურების ხელმძღვანელებმა, ასევე თბილისის ვიცე-მერმა ამ კითხვებს პასუხები გასცეს. „ნაციონალურ მოძრაობას“ საკითხის განხილვის ნაცვლად, წარმოდგენის მოწყობის სურვილი ჰქონდა. მმართველი გუნდის არც ერთ წარმომადგენელს „ნაციონალური მოძრაობის“ მიერ დადგმულ პოლიტიკურ წარმოდგენაში მონაწილეობის დრო არ აქვს“, – განაცხადა ვახტანგ შაქარიშვილმა.
ფრაქცია „ნაციონალური მოძრაობა“ ვარკეთილის მეტროში მომხდარი შემთხვევის საკითხზე დღეს რიგგარეშე სხდომის გამართვას ითხოვდა, თუმცა ის კვორუმის უქონლობის გამო ვერ შედგა.