გამოძიებას პაატა ბურჭულაძესთან კითხვები კონკრეტული მგზავრობის დაფინანსების, ქონების შეძენისა და სხვა ხარჯების მიზნობრიობაზე ექნება, – ამის შესახებ ჟურნალისტებს პროკურორმა მაია ჯვარშეიშვილმა განუცხადა, რომელიც ფონდ “იავნანას” დამფუძნებლის მოწმის სახით გამოკითხვის პროცესში მონაწილეობს.
როგორც მან აღნიშნა, გამოძიებამ ფონდიდან მისი დაფუძნებიდან 2017 წლის ჩათვლით არსებული დოკუმენტაცია ამოიღო და მათი შესწავლის შემდეგ არაერთი კითხვა გაუჩნდა ხარჯების მიზნობრიობასთან დაკავშირებით.
“გამოძიება მიმდინარეობს ობოლ და მზრუნველობამოკლებულ ბავშვთა ფონდ “იავნანას” კუთვნილი თანხების არამიზნობრივ ხარჯვასთან დაკავშირებით. გამოძიების პერიოდში ამოღებულია ფონდ „იავნანას“ დაფუძნებიდან 2017 წლის ჩათვლით დოკუმენტაცია. მათი შესწავლის პირობებში გამოიკვეთა არაერთი მნიშვნელოვანი, საინტერესო და მათ შორის საეჭვო გარემოება ფონდის კუთვნილი თანხების ხარჯვის მიზნობრიობასთან დაკავშირებით, შესაბამისად, გამოძიებას აქვს კითხვები ფონდის დამფუძნებელთან და მის ყოფილ პრეზიდენტთან. დღეს სწორედ ამ საკითხებზე მოხდება მისი მოწმის სახით გამოკითხვა, მაგისტრ მოსამართლესთან თავად პაატა ბურჭულაძის მოთხოვნის შესაბამისად”, – განაცხადა ჯვარშეიშვილმა.