საქართველოსადმი ასეთი მხარდაჭერა ირაკლი კობახიძის დიპლომატიური წარმატებაა, – ამის შესახებ საპარლამენტო უმრავლესობის წევრმა ვანო ზარდიაშვილმა განაცხადა.
„მაშინ როდესაც ჩვენი საპარლამენტო გუნდის ლიდერმა და პარლამენტის თავმჯდომარემ ირაკლი კობახიძემ შეძლო საკონსტიტუციო რეფორმის იმდენად წარმატებით წარმართვა, რომ ავტორიტეტულმა ევროპულმა ორგანიზაციამ – ვენეციის კომისიამ, ეს რეფორმა შეაფასა, როგორც დადებითი ნაბიჯი ქვეყნის კონსტიტუციური სისტემის კონსოლიდაციისა და გაუმჯობესების თვალსაზრისით, არ მიკვირს, რომ ასეთივე წარმატებით განაგრძობს ირაკლი კობახიძე ვიზიტს აშშ-ში და სწორედ მის ვიზიტს მოჰყვა საქართველოსადმი ასეთი მხარდამჭერი განცხადებები ამერიკელი სენატორების მხრიდან. საქართველოსადმი ასეთი მხარდაჭერა ირაკლი კობახიძის დიპლომატიური წარმატებაა. აღსანიშნავია, რომ აშშ-ის, როგორც ჩვენი მეგობარი ქვეყნისა და სტრატეგიული პარტნიორის მხარდაჭერით, ჩვენი გუნდი აგრძელებს რეფორმებს ჩვენი ქვეყნის უკეთესი მომავლისთვის“, – განაცხადა ზარდიაშვილმა.
ვანო ზარდიაშვილის კომენტარს საქართველოს პარლამენტი ავრცელებს.