სამწუხაროდ, ეს განცხადებები გარკვეულ ეჭვებს ბადებს, უნდა დაველოდოთ გამოძიების შედეგებს, – ასე ეხმაურება საქართველოს პარლამენტის თავმჯდომარე ირაკლი კობახიძე აზერბაიჯანელი ჟურნალისტის აფგან მუხთარლის განცხადებას, რომლის მიხედვითაც მისი გატაცების შესახებ ინფორმირებული იყვნენ საქართველოს ყოფილი და მოქმედი პრემიერ-მინისტრები.
მისი თქმით, აფგან მუხთარლის საქმეზე ამერიკის შეერთებულ შტატებში ვიზიტის ფარგლებში გამართულ ერთ-ერთ შეხვედრაზე ისაუბრეს.
„პარლამენტი ახორციელებს თავის საზედამხედველო ფუნქციებს ამ მიმართულებით. ჩვენ ველოდებით გამოძიების შედეგებს და გვაქვს ძალიან დიდი იმედი, რომ ამ საქმეს საბოლოოდ ნათელი მოეფინება. რაც შეეხება ჩვენს ამერიკელ მეგობრებს, ერთ-ერთ შეხვედრაზე გვქონდა საუბარი მუხთარლის საქმეზე. ჩვენ საქმის კურსში ჩავაყენეთ ადმინისტრაციის წარმომადგენლები იმის თაობაზე, თუ როგორ მიმდინარეობს საქმის გამოძიება, როგორ არის ამ ყველაფერში ჩართული პარლამენტი და ჩვენ იქაც გამოვთქვით იმედი, რომ საბოლოო ჯამში ეს გამოძიება წარმატებით დასრულდება“,- განაცხადა საქართველოს პარლამენტის თავმჯდომარემ.