საპარლამენტო უმრავლესობის დეპუტატმა დიმიტრი ხუნდაძემ საქართველოს ყოფილი პრეზიდენტის მიხეილ სააკაშვილის ირგვლივ მიმდინარე პროცესები ტელეკომპანია „იბერია“-ს გადაცემაში „თავისუფალი სივრცე“ შეაფასა. როგორც ხუნდაძემ აღნიშნა, უკრაინამ დიდი შეცდომა დაუშვა, როდესაც ქართული საზოგადოების მიერ დაწუნებული პრეზიდენტი მიიღო, რაც მისი თქმით, ბუმერანგივით დაუბრუნდათ დაშვებული შეცდომა.
„მინდა ჩემი პოლიტიკური შეფასება გავაკეთო იმ კადრებთან დაკავშირებით, რაც ყველამ ვიხილეთ. ჩემთვის შეურაცხმყოფელია, როგორც ქართველისთვის ეს კიდევ უფრო მძიმედ აღსაქმელია, რომ შენი ქვეყნის ყოფილი პრეზიდენტი უკვე მერამდენედ დაბალ სართულში ვიხილეთ. ეს ადამიანი არის აბსოლუტურად გაუწონასწორებელი, ავანტურისტი და დამანგრეველი ბუნების მქონე, მან ეს თავისი პოლიტიკური მოღვაწეობის პროცესში დაამტკიცა. ნახეთ როგორია მისი განცხადებების რიტორიკა – „მე მაქვს შესაბამისი გამოცდილება და მე ვიცი, როგორ უნდა იმუშავოს ციხეებმა“.
დიახ, მე ვიცი როგორ იმუშავა ციხეებმა, პირადაპირ ციფრებს გეუბნებით – 5 დღეში იყო 2 გვამი. ასევე მისი კიდევ ერთი წინადადება – „ათჯერ უფრო საშიში ვარ, ვიდრე ვიყავი“ – ანუ თუ ამას ათჯერ გავამრავლებთ 5 დღეში შეიძლება 20 გვამის შემოთავაზებას გვიკეთებს ყოფილი პრეზიდენტი. შეცდომა დავუშვით ჩვენ, როცა ასეთი ადამიანი ავირჩიეთ 2003 წელს პრეზიდენტად. მე იმედი მაქვს, რომ შეცდომას აღარ დავუშვებთ.
უკრაინამაც დაუშვა შეცდომა როცა ქართული საზოგადოების მიერ დაწუნებული პრეზიდენტი, მისი მთლიანი შემადგენლობით მიიღო და ჩააბარა საკუთარი ქვეყანა სამართავად, რაც ბუმერანგივით უბრუნდებათ. მეორე შეცდომა იყო, როცა საზღვარი ვერ გააკონტროლა უკრაინამ და მესამე შეცდომა იყო ის, რომ საქართველოს გაცხადებული აქვს მისი ექსტრადირება მოხდეს საქართველოში, ესეც არ აღსრულებულა. რა თქმა უნდა, ეს მათი გადასაწყვეტი იყო როდესაც საზღვარი დაარღვია მიხეილ სააკაშვილმა, როგორც გვეუბნებოდა თითქოს ხელში აყვანილი შემოყვანეს, მაგრამ მე ვერ ვნახე ის ხელში აყვანილი, ქოჩრით გაყვანილი ვნახე და მრცხვენია, ჩემთვის ეს არ არის სასიამოვნო საყურებელი.
კიდევ ერთხელ ვამბობ, სიფრთხილე ყველას მართებს, რადგან ასეთი გაუწონასწორებელი პიროვნებები ზოგიერთი პოლიტიკური ჯგუფებისთვის, ზოგჯერ ქვეყნებისთვისაც მისაღებია, როცა ისინი საკუთარ პერსპექტივას ხედავენ მხოლოდ რევოლუციური გზით რომ მიაღწიონ საწადელს, ასეთ პიროვნენები ზოგჯერ საინტერესონი ხდებიან მათთვის. ამიტომ ვფიქრობ, ასეთი ადამიანების მიმართ ყველგან უნდა იყვნენ უფრო ზუსტნი და გადაწყვეტილებები უნდა იყოს მიღებული, ისეთი როგორიც ამ საფრთხეებს შეამცირებს“, – განაცხადა დიმიტრი ხუნდაძემ.