“როგორც ჩემმა მეგობარმა იხუმრა, ალიოშა დევდარიანის არქივებში იქექებით, იქნებ “შავი ლაქა“ ნახოთ”

თქვენ იმ  ხის ნაყოფი  ხართ, რომლებმაც არ იციან  რა არის  სახალხო დამცველი – ასე მიმართა, საპარლამენტო უმრავლესობის წევრმა ვანო ზარდიაშვილმა ოპონენტებს.
ზარდიაშვილმა ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე, სადაც სახალხო დამცველის რეკომენდაციების ანგარიშის განხილვა მიმდინარეობს, საპარლამენტო უმცირესობის წარმომადგენლებს მიმართა.
„თქვენ იმ ხის ნაყოფი ხართ, რომელმაც საერთოდ არ იცის, რა არის სახალხო დამცველი. თუ მაინცდამაინც გინდათ შეგახსენებთ, როგორ ირჩევდით სახალხო დამცველს, რა გარიგებების საფუძველზე და რას ელოდით მისგან“ – მიმართა ზარდიაშვილმა. ზარდიაშვილმა აღნიშნა, რომ ოპონენტებს ხელისუფლების მიღწევების აღიარება არ სურთ. „თქვენ ზუსტად იმ განსხვავების დანახვა არ გინდათ, თუ რა განსხვავებაა ხელისუფლებებს შორის, ადამიანის უფლებებთან და კერძო საკუთრებასთან მიმართებაში. თქვენ აწყობთ მასკარადს იმისთვის, რომ რამენაირად გადაფაროთ ეს წინსვლა და წარმატება. როგორც ჩემმა მეგობარმა დათომ იხუმრა, ალიოშა დევდარიანის არქივებში იქექებით, იქნებ რაიმე ხელისუფლებასთან მიმართებაში „შავი ლაქა“ ნახოთ. მაგრამ კარგია, იმუშავეთ, თქვენ ეს კარგად გამოგდით, ჩვენ ამასაც გამოვიყენებთ იმისთვის, რომ ჩვენი ხალხისა და ქვეყნის მდგომარეობა კიდევ უფრო გავაუმჯობესოთ“, – განაცხადა ზარდიაშვილმა.