აბსოლუტურად გამოვრიცხავ პოლიტიკურ მოტივაციას, – ამის შესახებ ადამიანის უფლებათა დაცვის კომიტეტის თავმჯდომარემ სოფო კილაძემ გიგი უგულავასთვის გამოტანილი განაჩენის შესახებ მისი ადვოკატის განცხადების კომენტირებისას განაცხადა.
“როდესაც ასეთი ტიპის დანაშაულებზე საქმე პასუხისმგებლობაზე მიდგება, რა თქმა უნდა, ყოველთვის ამ მხარის გასასამართლებელი საბუთია, რომ პოლიტიკური დევნაა და ამიტომ ხდება განაჩენების დადგომა სასამართლოს მხრიდან. ჩვენი ერთ-ერთი უმნიშვნელოვანესი მონაპოვარი არის სამართლებრივი სახელმწიფოს პრინციპის განმტკიცება. ჩვენთან არსებობენ ინსტიტუტები და არსებობს სასამართლო, რომელიც იღებს გადაწყვეტილებებს. ეს განაჩენი არ მოსწონს რა თქმა უნდა ერთ-ერთ მხარეს და დამატებით ხდება იმის ტირაჟირება, თითქოს პოლიტიკურად მოტივირებულია გადაწყვეტილება, მაგრამ მე აბსოლუტურად გამოვრიცხავ ამ შემთხვევაში პოლიტიკურ მოტივაციას. თვითონ სასამართლოს გადაწყვეტილების საკითხზე, შესაძლოა იდაოს მხარემ იმ მოცემულობის ფარგლებში, რასაც მას სამართლებრივი პროცედურები და კანონი აძლევს, მათ შორის მიმართოს სტრასბურგის სასამართლოს, მაგრამ ის, რომ აქ პოლიტიკური დევნაა, ამას აბსოლუტურად გამოვრიცხავ”, – განაცხადა კილაძემ.