საქართველოს პრეზიდენტმა გიორგი მარგველაშვილმა “ლიტვის საზოგადოებრივ მაუწყებელთან” მიცემულ ინტერვიუში, საქართველოს ყოფილი პრეზიდენტის, მიხეილ სააკაშვილის პოლიტიკური ხასიათის დევნასთან დაკავშირებით საუბრისას განაცხადა, რომ მას აკისრია პასუხისმგებლობა, უპასუხოს სახელმწიფო ინსტიტუტებს, რადგან ის ორჯერ იყო საქართველოს პირველი პირი.
მისივე თქმით, სააკაშვილის პასუხების შემდეგ, შესაძლებელი იქნება იმის განსაზღვრა, მის მიმართ დასმული კითხვები ადეკვატური იყო, თუ პოლიტიკურად მოტივირებული.
”მჯერა, რომ, როგორც ორჯერ არჩეული პრეზიდენტი, მას აქვს პასუხისმგებლობა, პატივი სცეს სასამართლოსა და სამართალდამცავებს. ის ორჯერ იყო ამ ერის პირველი პირი და მას აკისრია პასუხისმგებლობა, უპასუხოს სახელმწიფო ინსტიტუტებს. მხოლოდ მისი პასუხების შემდეგ, შეგვეძლება განვსაზღვროთ მის მიმართ დასმული კითხვები ადეკვატური იყო, თუ პოლიტიკურად მოტივირებული“, – განაცხადა გიორგი მარგველაშვილმა.