„საერთაშორისო გამჭვირვალობა საქართველოს“ აღმასრულებელმა დირექტორმა ეკა გიგაურმა, ოკუპირებულ ტერიტორიაზე გარდაცვლილი არჩილ ტატუნაშვილის ცხედრის გადმოცემის საკითხზე, კომენტარი გააკეთა. გიგაური მიიჩნევს, რომ რუსეთი არ შეიძლება იყოს საქართველოს მეგობარი და ამას ის ფაქტიც მოწმობს, რომ ოჯახს მიცვალებულის დატირების საშუალება ამ დრომდე არ აქვს.
„მართლაც ტრაგიკული ფაქტია, რომ ოჯახს არ შეუძლია, დაიტიროს გარდაცვლილი ადამიანი და ეს ჩვენ კიდევ ერთხელ გვანახებს, რომ რუსეთი არ შეიძლება იყოს საქართველოს მეგობარი. რა პოლიტიკასაც ატარებს რუსეთი საქართველოსთან მიმართებაში, არის აგრესიული და მას არ შეიძლება უნდოდეს საქართველოს განვითარება. ის არ შეიძლება, რომ ზრუნავდეს ჩვენს მოქალაქეებზე. ვფიქრობ, დღეს იმ ადამიანებს, რომლებიც პრორუსული განწყობებით არიან გაჟღენთილები, უნდა ვანახოთ ეს ფაქტი და კიდევ ერთხელ შევახსენოთ, რომ რუსეთი არის აგრესორი და ზუსტად ასეთი ტრაგედიების მიზეზი, ჩვენი ქვეყნის ტერიტორიაზე“, – განაცხადა ეკა გიგაურმა.
სახელმწიფო უსაფრთხოების სამსახურის ინფორმაციით, მიმდინარე წლის 22 თებერვალს ოკუპირებული ცხინვალის წარმომადგენლებმა საქართველოს მოქალაქეები არჩილ ტატუნაშვილი, ლევან ქუტაშვილი და იოსებ პავლიაშვილი უკანონოდ დააკავეს. არჩილ ტატუნაშვილი 23 თებერვალს ოკუპირებულ ქალაქ ცხინვალის საავადმყოფოში გარდაიცვალა. არჩილ ტატუნაშვილის ცხედარი საქართველოში ჯერ არ გადმოუსვენებიათ. ლევან ქუტაშვილი და იოსებ პავლიაშვილი კი ცხინვალის ე.წ. ციხიდან გაათავისუფლეს, თუმცა კვლავ ოკუპირებულ ტერიტორიაზე რჩებიან.
ეკა გიგაური – არჩილ ტატუნაშვილის საქმე კიდევ ერთხელ გვანახებს, რომ რუსეთი არ შეიძლება იყოს საქართველოს მეგობარი
2018/03/01 14:13:16
კომენტარები
ნანახია: 988 ჯერ