პარლამენტის საგარეო კომიტეტის თავმჯდომარე სოფიო ქაცარავა ოკუპირებული ცხინვალის დე-ფაქტო პროკურატურის განცხადებას ეხმაურება, სადაც ნათქვამია, რომ ტატუნაშვილი, რამდენიმე ქართველ მაღალჩინოსანთან ერთად, ოსი ხალხის გენოციდში ბრალდებულთა სიაში იყო, რომლის მიმართაც სისხლის სამართლის გამოძიება მიმდინარეობდა.
„ოკუპირებული რეჟიმის ე.წ. განცხადებას არანაირი ლეგიტიმაცია არ გააჩნია და ე.წ. „შავი სია” ვერანაირად ვერ იქნება გამართლება იმისა, რაც მოხდა ტატუნაშვილთან მიმართებით. ამ დროისთვის ჩვენთვის მთავარი პრიორიტეტი და ამოცანაა ტატუნაშვილის ცხედრის გადმოსვენება და ყველაფერი კეთდება ამისთვის. ყველანაირ ფორმატსა და ბერკეტს ვიყენებთ ამისათვის და რა თქმა უნდა მეორე, მთავარი ამოცანა არის, რომ მოხდეს დაუყოვნებლივ ამ ფაქტის გამოძიება, რაშიც საერთაშორისო საზოგადოებამაც გამოთქვა სურვილი, რომ დაგვეხმარონ და ხელი შეგვიწყონ”, – აღნიშნავს სოფიო ქაცარავა.