“რუსებმა ჯერ სისხლში გაგვატარებინეს წინა წლები, ახლა უნდათ, რომ ცრემლში გავატაროთ”

რუსებმა ჯერ სისხლში გაგვატარებინეს წინა წლები, ხოლო ახლა უნდათ, რომ ცრემლში გავატაროთ, – ამის შესახებ საპარლამენტო უმრავლესობის დეპუტატმა ზაქარია ქუცნაშვილმა პორტალ „კვირას“ პრესკლუბში გამართულ პრესკონფერენციაზე განაცხადა.
ქუცნაშვილი თვლის, რომ საოკუპაციო რეჟიმს საქართველომ, საერთაშორისო ფორმატებთან ერთად, ინდივიდუალური რეაგირების მექანიზმებიც უნდა დაუპირისპიროს.
კონკრეტულად კი, უნდა შეგროვდეს სამხილები და სამართლებრივი დევნა უნდა განხორციელდეს დეფაქტო რეჟიმის დავალებების უშუალო შემსრულებლის მიმართ.
„რუსებმა ჯერ სისხლში გაგვატარებინეს წინა წლები, ხოლო ახლა უნდათ, რომ ცრემლში გავატაროთ – ეს არის მათი აგრესიული პოლიტიკის მიზანი. ამიტომ ვფიქრობ, რომ დამატებითი ზომები უნდა მივიღოთ. რადგან რუსეთის მზარდ აგრესიას ჩვენ ვერაფერს ვუკეთებთ, ვფიქრობ, ინდივიდუალური რეაგირების მექანიზმები უნდა გავააქტიუროთ, ცალკეულ დანაშაულში მხილებული პირების მიმართ, საქართველომ უნდა გამოიყენოს ყველა კანონიერი ინსტრუმენტი, – ვგულისხმობ როგორც ინდივიდუალური ხასიათის სანქციებს, დაწყებული გადაადგილების თავისუფლების შეზღუდვით, ასევე, დაუსწრებლად ბრალის წაყენების და ექსტრადირების მოთხოვნის უფლებას. ასევე ჩვენ შეგვიძლია დანაშაულის ჩადენაში ეჭვმიტანილი ხალხის მიმართ, სხვა სამართლებრივი მექანიზმები გამოვიყენოთ იმისათვის, რომ მათი ქონებრივი და ბიზნესინტერესები შევზღუდოთ, როგორც საქართველოს, ასევე საქართველოს ტერიტორიის გარეთ. მართალია, როცა ტერიტორიას ვერ აკონტროლებ, სამხილების შეგროვება რთულია, თუმცა თანამედროვე პირობებში არსებობს ინსტრუმენტები, რომ გარკვეული სახის სამხილები მოვიპოვოთ, შევკრიბოთ ისინი და ამ სამხილების კვალობაზე ვაწარმოოთ ინდივიდუალური დევნა ყველა პირის მიმართ, რომლებიც დეფაქტო რეჟიმის უკანონო დავალებების შემსრულებლები არიან და მძიმე დანაშაულებს ჩადიან. ვფიქრობ, საერთაშორისო ფორმატების კვალდაკვალ, კოლექტიურიდან ინდივიდუალურ დევნაზე გადასვლა იქნება ყველაზე ჭკვიანური რეაგირების ფორმა ამ ეტაპზე“, -აღნიშნა ზაქარია ქუცნაშვილმა.