დღეის მდგომარეობით, საქართველოს ოკუპირებულ ტერიტორიებზე მცხოვრები ქალები და გოგოები უსაფრთხოების კუთხით წარმოუდგენელი საფრთხეებისა და გამოწვევების წინაშე დგანან, – ამის შესახებ პარლამენტის პირველმა ვიცე-სპიკერმა თამარ ჩუგოშვილმა, გაეროს ქალთა სტატუსის განმსაზღვრელი კომისიის 62-ე სესიაზე, სიტყვით გამოსვლისას განაცხადა.
„დღეის მდგომარეობით, საქართველოს ოკუპირებულ ტერიტორიებზე მცხოვრები ქალები და გოგოები უსაფრთხოების წარმოუდგენელი საფრთხეებისა და გამოწვევების წინაშე დგანან ადამიანის ძირითადი უფლებების განხორციელების კუთხით, როგორიც არის მშობლიურ ენაზე სწავლის უფლება, გადაადგილების თავისუფლება. გარდა ამისა, ათასობით იძულებით გადაადგილებულ ქალებსა და გოგოებს, კონფლიქტის ზონაში მცხოვრებ ქალებს სჭირდებათ უფრო მეტი შესაძლებლობები“, – განაცხადა თამარ ჩუგოშვილმა.
მისი თქმით, გასული წელი საქართველოში მნიშვნელოვანი იყო ოჯახში ძალადობისა და ქალების წინააღმდეგ ძალადობის აღმოფხვრის კუთხით მუშაობის თვალსაზრისით.
„საქართველომ სტამბოლის კონვენციის რატიფიცირება მოახდინა და ეროვნულ კანონმდებლობაში ცვლილებები შეიტანა, რათა უზრუნველყოფილი ყოფილიყო ქალების წინააღმდეგ ძალადობასთან ბრძოლის ხელშესახები მექანიზმები. ვფიქრობ, რომ ქალების წინააღმდეგ ძალადობის პრობლემა უდავოდ უკავშირდება ქალების ეკონომიკურ გაძლიერებას, მათ შრომით უფლებებს, წვდომას რეპროდუქციულ ჯანდაცვაზე“, – აღნიშნა პარლამენტის პირველმა ვიცე-სპიკერმა.
თამარ ჩუგოშვილმა ასევე ისაუბრა ადრეული ქორწინების პრობლემაზე.
„ბოლო წლებში საქართველომ მნიშვნელოვანი ნაბიჯები გადადგა ადრეული ქორწინების პრობლემის აღიარებისა და საკანონმდებლო დონეზე პრევენციის მექანიზმების შექმნის კუთხით. მიუხედავად ამ მიღწევებისა, ჩვენ ვაღიარებთ, რომ ღარიბი ქალების, გოგოების და სოფლის რაიონებში მცხოვრები ახალგაზრდა ქალების მონაწილეობა ეკონომიკურ პროგრამებში უნდა გაიზარდოს. ასევე, სახელმწიფო პოლიტიკის შემუშავებისას გათვალისწინებულ უნდა იქნას სოფლის რაიონებში მცხოვრები ქალებისათვის პროფესიული უნარების განვითარება და წვდომა ფინანსებზე“, – განაცხადა მან.
საქართველოს პარლამენტის პირველი ვიცე-სპიკერი ასევე შეეხო საპარლამენტო და ადგილობრივ არჩევნებზე სავალდებულო გენდერული კვოტების შემოღებაზე კანონპროექტის განხილვის საკითხს.
„შემდეგ კვირას საქართველოს პარლამენტი კენჭს უყრის კანონპროექტს საპარლამენტო და ადგილობრივ არჩევნებზე სავალდებულო გენდერული კვოტების შემოღებაზე. თუ პარლამენტი მხარს დაუჭერს ამ კანონპროექტს, ის ქალების მზარდ წარმომადგენლობას უზრუნველყოფს ადგილობრივი ხელისუფლებისა და ეროვნულ დონეზე. დარწმუნებული ვარ, რომ საქართველოს პარლამენტი მიიღებს ამ ისტორიულ გადაწყვეტილებას, რათა უზრუნველყოს გენდერული თანასწორობა ჩვენს ქვეყანაში“, – დასძინა თამარ ჩუგოშვილმა.