პარლამენტის ვიცე-სპიკერმა თამარ ჩუგოშვილმა საჯარო რეესტრის ეროვნული სააგენტოს თავმჯდომარის პაპუნა უგრეხელიძის წინააღმდეგ გაჟღერებული სექსუალური შევიწროვების ფაქტების შესახებ დასმული კითხვის საპასუხოდ განაცხადა, რომ თუ ეს ფაქტი დადასტურდება, ასეთ შემთხვევაში შესაძლებელია, კანონით გათვალისწინებული სხვადასხვა რეაგირება იქნას გამოყენებული.
თამარ ჩუგოშვილი მიიჩნევს, რომ ფაქტები შესწავლას და რეაგირებას საჭიროებს.
„პირველ რიგში, ვიტყვი, რომ სექსუალური შევიწროების ყველა ფაქტი, მითუმეტეს, როდესაც საქმე ეხება მაღალი თანამდებობის პირებს, ძალიან მძიმე ბრალდებაა. ვფიქრობ, რომ ყველა მათგანი და ეს კონკრეტული შემთხვევაც, აუცილებლად უნდა იყოს სათანადოდ შესწავლილი. ამ კონკრეტულ ფაქტზე ინფორმაცია არ მაქვს, ვიცი მხოლოდ ის, რაც მედიით გაჟღერდა. შემიძლია დავაფიქსირო ჩემი პოზიცია, რომ უნდა მოხდეს შესაბამისი მოკვლევა და მხოლოდ ამის შემდეგ უნდა მოხდეს გადაწყვეტილების მიღება. თუ ეს ფაქტი დადასტურდება, ასეთ შემთხვევაში შესაძლებელია, კანონით გათვალისწინებული სხვადასხვა რეაგირება იქნას გამოყენებული”, – განაცხადა თამარ ჩუგოშვილმა.
მედიაში გავრცელებული ინფორმაციით, პაპუნა უგრეხელიძეს სექსუალურ შევიწროებაში ადანაშაულებენ.