საქართველოს პარლამენტის პირველი ვიცე-სპიკერის თამარ ჩუგოშვილის განცხადებით, სამთავრობო ცვლილებებთან დაკავშირებით გავრცელებული ინფორმაცია ჭორია.
მისი თქმით, სამთავრობო ცვლილებები არ იგეგმება.
„ეს არის მორიგი ჭორი, ზუსტად ისეთივე, როგორც ბევრჯერ მივისმინეთ აქამდე და დადასტურდა, რომ ჭორი იყო”, – განაცხადა ჩუგოშვილმა.
კითხვაზე, აქვს თუ არა მას შეთავაზება იუსტიციის მინისტრის თანამდებობაზე, ჩუგოშვილი აცხადებს, რომ ესეც დიდი ჭორია.
„ეს მითუმეტეს დიდი ჭორია. არ ვიცი, საიდან იგონებენ ადამიანები ამ ჭორებს. არანაირი შეთავაზება არ იქნება და არც განიხილება ეს საკითხი საერთოდ. ჩვენ გვყავს იუსტიციის მინისტრი, რომელიც მუშაობს და ვფიქრობ, მას ხელი ეშლება ასეთი განცხადებებით. მე რაც შემეხება, ძალიან დიდი პასუხისმგებლობა მაქვს საქართველოს პარლამენტში და საკმაოდ დიდია ისედაც ეს პასუხისმგებლობა, ახალი რომ არ დავიმატო”, – განაცხადა თამარ ჩუგოშვილმა.