პრემიერ-მინისტრმა, „ქართული ოცნების” თავმჯდომარე გიორგი კვირიკაშვილმა, პარტიის მცხეთის საოლქო ორგანიზაციის კონფერენციაზე სიტყვით გამოსვლისას „მაღალმთიანი რეგიონების განვითარების შესახებ” საქართველოს კანონზე ისაუბრა და განაცხადა, რომ კანონის თანახმად, მაღალმთიან რეგიონში მცხოვრები მოსახლეობისთვის დაწესებულია როგორც სოციალური, ისე საგადასახადო შეღავათები.
„მთასთან დაკავშირებით, რომელიც ჩვენი ქვეყნის სიამაყეა და მოგეხსენებათ, ჩვენი ქვეყნის ტერიტორიის 70%-ს მთიანი რეგიონები შეადგენს, შევიმუშავეთ „მაღალმთიანი რეგიონების განვითარების შესახებ” საქართველოს კანონი, რომელიც პარლამენტში წარმატებით გავიდა და რომლის თანახმად, მაღალმთიან რეგიონში მცხოვრები მოსახლეობისთვის დაწესებულია როგორც სოციალური, ისე საგადასახადო შეღავათები. ჩვენ ჩვენი ხალხი მთაში არა მხოლოდ უნდა დავამაგროთ, არამედ მაქსიმალურად უნდა შევუწყოთ ხელი ბარიდან მთაში მოსახლეობის მიგრაციას”, – განაცხადა კვირიკაშვილმა.
პრემიერ-მინისტრმა იმ პროექტების შესახებ, რომელსაც ხელისუფლება მთაში ახორციელებს.
„მართლაც უპრეცედენტო ინფრასტრუქტურული პროექტი არის პირიქითა ხევსურეთთან დამაკავშირებელი გზის მშენებლობა – როშკა-არხოტის 28 კმ-იანი გზა, რომელიც აქამდე არ არსებობდა და იქ გადაადგილება მხოლოდ ფეხით, ცხენითა თუ ვერტმფრენით იყო შესაძლებელი. ასე რომ, მალე პირიქითა და პირაქეთა ხევსურეთს, სრულიად ახალი გზა დააკავშირებს ერთმანეთთან”, – განაცხადა პრემიერმა.
კვირიკაშვილის განცხადებით, დაგეგმილია ასევე მცხეთიდან ლარსისკენ მიმავალი თანამედროვე ავტობანის მშენებლობა.
„დაწყებულია გვირაბის მშენებლობა დარიალის ხეობაში. სატრანზიტო ფუნქცია ამ რეგიონმა სრულფასოვნად უნდა განახორციელოს. ამისთვის, ეს ინფრასტრუქტურა უნდა იყოს თანამედროვევ სტანდარტების შესაბამისი. ჩვენ დავიწყეთ გერგეტის სამების ეკლესიასთან მისასვლელი გზის მშენებლობა, ეს პროექტი 7 მილიონ 800 ათასი ლარი ჯდება. აშენდება სნო-ჯუთა-როშკა- შატილი-ომალო- ხადორის ხეობა-ბაწარა-ახმეტის გზა. მისი სავარაუდო ღირებულება 200 მილიონ ლარამდეა. ეს იქნება სტრატეგიული მნიშვნელობის გზა ჩვენი ქვეყნისთვის. ამ გზას მრავალფუნქციური დანიშნულება აქვს. დასრულდა თიანეთისა და ჟინვალის შემაერთებელი გზის მშენებლობა”, – განაცხადა გიორგი კვირიკაშვილმა.