„მინდელის შახტაში გარდაცვლილი მეშახტეების სიცოცხლე და ჯანმრთელობა ჩვენ კომპანიაშია დაზღვეული”, – ამის შესახებ ამერიკული Global Benefits Group-ის წარმომადგენელი სადაზღვევო კომპანია Global Benefits Georgia-ს ხელმძღვანელი ნინო კობახიძე სოციალურ ქსელში წერს.
“ვიზრუნებთ მათ ოჯახებზე და ვეცდებით, გადავარჩინოთ დაშავებულები. ვიზიარებ ოჯახების მწუხარებას. 2011 წლიდან ყველა მათ სადაზღვევო რისკს მოვყვები, შახტაშიც ვყოფილვარ. რისკიანი პროფესიის მძიმე დასასრული”, – წერს ნინა კობახიძე.
შეგახსენებთ, რომ 5 აპრილს, გამთენიისას ტყიბულში, მინდელის სახელობის შახტაში, უბედურ შემთხვევას ექვსი ადამიანი ემსხვერპლა, სამი კი დაშავდა.
მომხდარ ფაქტთან დაკავშირებით, გამოძიება დაიწყო საქართველოს სსკ-ის 240-ე მუხლის მეორე ნაწილით, რაც სამთო, სამშენებლო ან სხვა სამუშაოების წარმოებისას, უსაფრთხოების წესების დარღვევას გულისხმობს.
დანაშაული 5 წლამდე თავისუფლების აღკვეთას ითვალისწინებს.
ცნობისათვის, „საქნახშირი“, სადაც დღეს გამთენიისას ტრაგედია დატრიალდა, ჰოლდინგ „საქართველოს ინდუსტრიული ჯგუფის“ შვილობილი კომპანიაა. ჰოლდინგი „საქართველოს ინდუსტრიული ჯგუფი“ („ჯი–აი–ჯი“) საქართველოში ერთ-ერთ უმსხვილეს ინდუსტრიულ ჯგუფს წარმოადგენს, რომლის ხელმძღვანელი პარტია „ნაციონალური მოძრაობის“ ერთ-ერთი სახე დავით ბეჟუაშვილია.
ნინო კობახიძე: მინდელის შახტაში გარდაცვლილი მეშახტეების სიცოცხლე და ჯანმრთელობა ჩვენ კომპანიაშია დაზღვეული
2018/04/05 16:40:18
ნანახია: 1653 ჯერ