დედაქალაქის მერის, კახა კალაძის განცხადებით, თბილისის სატრანსპორტო კომპანია სრულ მზადყოფნაშია, დღეიდან პარკირების მენეჯმენტი განახორციელოს, – ამის შესახებ კალაძემ თბილისის მთავრობის სხდომაზე განაცხადა.
კალაძის თქმით, პარკირებასთან დაკავშირებული ნებისმიერი გადასახადის გადახდა მოქალაქეებს სპეციალურ ვებგვერდზე, ასევე სწრაფი გადახდის აპარატებისა და ბანკების მეშვეობით შეეძლებათ.
“დღეს 10 აპრილია და როგორც ვთქვი, დღეიდან დედაქალაქის პარკირების სისტემის მენეჯმენტს თბილისის სატრანსპორტო კომპანია განახორციელებს. კომპანიაში არის სრული მზადყოფნა, რომ პარკირების სისტემის მენეჯმენტი ტრანსპორტირებამ განახორციელოს. მინდა მოგაწოდოთ რამდენიმე ინფორმაცია. შეიქმნა თბილისის პარკირების სისტემის ვებგვერდი, რომლის მეშვეობით მოქალაქეები შეძლებენ როგორც ჯარიმების, ასევე პარკირების საფასურის გადახდას, ასევე გაეცნობიან წესებს და სხვა ინფორმაციას. ასევე ამოქმედდება თბილისის პარკინგის ცენტრალური ოფისი, რომელიც იქნება ცაბაძის 2 ნომერში, სადაც მოქალაქეებს მოემსახურებიან. ასევე მნიშვნელოვანია ის, რომ პარკირებასთან დაკავშირებული ნებისმიერი გადასახადის გადახდა იქნება შესაძლებელი სწრაფი გადახდის აპარატიდან და ბანკების მეშვეობით. თბილისის პარკინგის თანამშრომლები აღჭურვილები იქნებიან შესაბამისი ტექნიკით, რაც საქმიანობისთვის სჭირდებათ. შეიძლება ითქვას, რომ ყველანაირად გამართული იქნება პროცესი, რომელსაც კომპანია წარმართავს. მინდა ვთხოვო თბილისის მოსახლეობას, დაიცვან პარკირების მომსახურების სარგებლობისთვის აუცილებელი წესები. ჯარიმებიდან შემოსული ყველა თეთრი იქნება მიმართული თბილისის სატრანსპორტო პოლიტიკის გაძლიერებისკენ და არსებული რეალობის შესაცვლელად. მხედველობაში მაქვს მიწისქვეშა პარკინგების მოწყობა, ზოგადად პარკირების სისტემის გამართვა, რომელიც სერიოზულ პრობლემას წარმოადგენს“, – განაცხადა კალაძემ.
ცნობისთვის, თბილისის პარკირების ვებგვერდის მისამართია – TP.ge.