ძალიან მნიშვნელოვანია, რომ ბიძინა ივანიშვილი პარტიის საქმიანობაში აქტიურად ბრუნდება, – ამის შესახებ საპარლამენტო უმრავლესობის ლიდერმა, არჩილ თალაკვაძემ განაცხადა.
მისი თქმით, დღეს “ქართული ოცნების” ყრილობა საქმიან ვითარებაში ჩატარდება, რომელსაც დელეგატები დაესწრებიან.
„ამ მომენტიდან პარტია “ქართულ ოცნებაში” რეფორმების ახალ ტალღას სათავეში ბიძინა ივანიშვილი ჩაუდგება. რაც ნიშნავს, რომ საჯარო პოლიტიკის შემუშავების და გადაწყვეტილებების დამუშავების პროცესი პარტიაში კიდევ უფრო მეტად გადმოინაცვლებს. პოლიტიკური საბჭო სახელისუფლებო გუნდს კიდევ უფრო დაეხმარება, რომ ზუსტად ის გადაწყვეტილებები მომზადდეს და რეფორმებზე იმ ხარისხის მსჯელობები შედგეს, რომელიც ჩვენს ქვეყანას მომავალი განვითარებისთვის სჭირდება. რაც შეეხება პარტიაში დაგეგმილ რეფორმებს აქ ძირითადი აქცენტი ჩვენს ამომრჩევლებთან და საზოგადოებასთან კომუნიკაციის კიდევ უფრო გააქტიურებაზე გაკეთდება.
ძალიან მნიშვნელოვანია, რომ ბიძინა ივანიშვილი პარტიის საქმიანობაში აქტიურად ბრუნდება. ის, როგორც დამფუძნებელი, პარტიას აქამდე მხარს უჭერდა, თუმცა ახლა მნიშვნელოვანია, რომ ის პარტიის თავმჯდომარის პოზიციიდან ჩვენს გუნდს კიდევ უფრო გააძლიერებს”, – განაცხადა არჩილ თალაკვაძემ.