ყველაფერს ვაკეთებთ და გავაკეთებთ თბილისის მერთან ერთად იმისთვის, რომ კლუბური ცხოვრება განვითარდეს, – ამის შესახებ იუსტიციის მინისტრმა, თეა წულუკიანმა განაცხადა.
მისი თქმით, ნარკოპოლიტიკის თემებზე მუშაობა 2013 წლიდან მიმდინარეობს და დასანანია, რომ აუცილებელი გახდა პროტესტი, რათა ზოგიერთ ნარკოლოგს გაეგო, რომ ნარკოპოლიტიკა მხოლოდ სამედიცინო თემა არ არის.
„როცა ნარკოპოლიტიკაზე ვმსჯელობთ, უნდა მოვუსმინოთ პოლიციასაც, პროკურატურასაც, მესაზღვრესაც, რომელიც დღე ერთია და რამდენჯერმე აკავებს ადამიანებს, რომელთაც შემოაქვთ ქვეყანაში ნარკოტიკი. ნარკორეალიზატორების სასჯელის დაწევა გამორიცხულია, პირიქით, მკაცრი მიდგომა გვინდა, რომელიც ბედავს და სიკვდილს სთავაზობს ჩვენს მომავალს“, – განაცხადა თეა წულუკიანმა.
ამასთან, მისი თქმით, ყველაფერი კეთდება თბილისის მერ კახა კალაძესთან ერთად იმისთვის, რომ კლუბური ცხოვრება განვითარდეს. თუმცა, კლუბი ვერ იქნება ადგილი, სადაც პოლიცია ვერ შედის.
„ყველაფერს ვაკეთებთ და გავაკეთებთ თბილისის მერთან ერთად იმისთვის, რომ კლუბური ცხოვრება განვითარდეს, თუმცა ეს ვერ იქნება ადგილი, სადაც პოლიცია ვერ შედის და ეს ვერ იქნება ადგილი, სადაც იყიდება სიკვდილი.
რაც შეეხება მომხმარებლებს, აუცილებელია ადამიანური და ჰუმანური მიდგომა, მაგრამ ნარკოტიკი ვერ გაპოპულარულდება ჩვენ ქვეყანაში და ნარკოტიკის მოხმარება ვერ დაკანონდება ჩვენ ქვეყანაში. ჩვენ გვჭირდება არა რადიკალიზმი, არამედ გონივრული მიდგომა და ამ მიმართულებით უნდა ვიაროთ ნაბიჯ-ნაბიჯ.
რაც შეეხება სპეცოპერაციის ფორმებს, ვერ დავინახე ვერანაირი ფორმა, რადგან არ ყოფილა არც ერთი ფიზიკურად დაზიანებული ადამიანი, რომელიც საჭიროებდა სამედიცინო დახმარებას და გუშინდელი საღამოს მდგომარეობით, პროკურატურაში არ იყო არც ერთი საჩივარი შესული ფიზიკურ ზიანთან დაკავშირებით. ეს ნიშნავს იმას, რომ სამართალდამცავმა სისტემამ იმუშავა მაქსიმალურად ფრთხილად. ჩვენ უნდა შევქმნათ ისეთი სისტემა, აქ თავად კლუბების ხელმძღვანელების თანამშრომლობა დაგვჭირდება, რომ პოლიციას არ დასჭირდეს კლუბში შესვლა“, – განაცხადა თეა წულუკიანმა.