ოდესის პოლიციის უფროსი, საქართველოს შს მინისტრის ყოფილი პირველი მოადგილე გია ლორთქიფანიძე აცხადებს, რომ ახმედ ჩატაევი საქართველოს შსს-ს ინფორმატორი და, საჭიროების შემთხვევაში, რადიკალურ დაჯგუფებებთან მოლაპარაკების დროს შუამავალი იყო, ხოლო როცა ამაზე უარი თქვა და ტერორისტებთან ერთად დაღესტანში გადასვლა დააპირა, დააკავეს.
ამის შესახებ გია ლორთქიფანიძემ გამოცემა “დეილიბისტთან” ექსკლუზიურ ინტერვიუში განაცხადა და აღნიშნა, რომ ჩატაევს სპეცსამსახურები იატაკქვეშეთში მოქმედ ჩრდილოკავკასიელ ფუნდამენტალისტ ისლამისტებთან მოლაპარაკების დროს იყენებდნენ და მისი მეშვეობით საქართველოს ტერიტორიაზე შესაძლო ტერორისტული თავდასხმებიც აღკვეთეს.
გამოცემა წერს, რომ ახმედ ჩატაევმა დევნილის სტატუსის მისაღებად ავსტრიას მიმართა. სწორედ ამ ქვეყანაში ის დოკუ უმაროვის წარმომადგენლის მოვალეობას ასრულებდა, მანამდე კი, 2010 წელს უკრაინაში იყო დაკავებული, თუმცა, არც უკრაინამ, არც საქართველომ არ განაცხადეს თანხმობა რუსეთში მის ექსტრადირებაზე. ამის მიზეზი ის იყო, რომ ჩატაევს, როგორც ჩეჩნეთის ომების ვეტერანს, ჟენევის კონვენცია იცავდა და საერთაშორისო უფლებადამცველები რუსეთისთვის მის გადაცემას დაუშვებლად მიიჩნევდნენ. “ერთია, აიყვანო ტერორისტი და მეორეა, ის გისოსებს მიღმა გყავდეს”, – ამბობს ინტერვიუში ლორთქიფანიძე. ის 2012 წლის სექტემბერში თავად ხელმძღვანელობდა სპეცოპერაციას, რომელიც ლაფანყურის ხეობაში ჩატარდა. სწორედ ამ სპეცოპერაციის დროს დაიჭრა ჩატაევი, რომელიც დააპატიმრეს, თუმცა, რამდენიმე თვის შემდეგ ახალმა ხელისუფლებამ, რომელმაც არენების შედეგად ჩანაცვლა სააკაშვილის ხელისუფლება, ის ციხიდან გაუშვა. “ჩემი აზრით, მათ იმედი ჰქონდათ, რომ ჩატაევი ან სააკაშვილის, ან ჩემს წინააღმდეგ მისცემდა ჩვენებას და სწორედ ამიტომ გაუშვეს ციხიდან”, – აცხადებს გიორგი ლორთქიფანიძე.