საპარლამენტო უმრავლესობის წევრი ზაზა ხუციშვილი მედიაჰოლდინგ „კვირას“ პრესკლუბში გამართულ ბრიფინგზე, დეტალურად აღწერს, თუ რატომ ვერ მოხერხდება 2019 წლამდე პენსიების ზრდა და დაბეჯითებით აცხადებს, რომ ამ მოწვევის პარლამენტარებს ხელფასი არ გაეზრდებათ.
“მოარული ხმები ხელფასის მატებასთან დაკავშირებით, სიცრუეა, ამ მოწვევის პარლამენტარებისათვის ხელფასის მატება არ იგეგმება. მოხდა შერწყმა ორი კომპონენტისა, რომელიც ისედაც არსებობდა, ეს გახლავთ პარლამენტარის ხელფასი და თანამდებობრივი სარგო. პარლამენტარის ხელფასი შეადგენს 2 ათას ლარს, ხელზე პარლამენტარი იღებს 1 600 ლარს და გარდა ამისა, თუ რა თანამდებობაზეა პარლამენტში, დაწყებული თავმჯდომარით, დამთავრებული კომიტეტის წევრობით და ა.შ. შემცირების პრინციპით, იღებს სარგოს, გარდა ამისა, არის კიდევ ქუთაისში მიმოსვლის გარკვეული თანხა, რომელიც სასტუმროს და კვებას ემსახურება. აქვე აღვნიშნავ, რომ პარლამენტარის ხელფასი, თავისი მოცულობით, ასეულშიც კი არ შედის, მიუხედავად ამისა, ეს თემა ძალიან ხშირად გამოიყენება პოპულისტური მიზნებისთვის. მინდა, ჩვენს მოსახლეობას ვუთხრა, რომ დღეის მონაცემებით, საქართველოში 700 ათასი პენსიონერია, 273 ათასი დევნილი (გარდა ფინანსური ვალდებულებისა, ამ ხალხისთვის ხელისუფლება ყოველწლიურად აშენებს 2 ათას ბინას მათთვის, ეს საკმაოდ გრძელვადიანი პროცესია) ამას გარდა, არის 400 ათასამდე სოციალურად დაუცველი პირი და 110 ათასი შშმ პირი, ყველა მათ წინაშე ხელისუფლებას ფინანსური ვალდებულება აქვს. ჩამოთვლილი დაახლოებით მილიონ ნახევარი ადამიანია. როდესაც ხელისუფლებაში მოვდიოდით, არ გვქონდა გაცხადებული გარკვეული თანხით პენსიის მატება, ჩვენ განვაცხადეთ, რომ რის საშუალებასაც ბიუჯეტი მოგვცემდა, იმის მიხედვით მოხდებოდა პენსიების ზრდა, 2019 და 2020 წლებში უკვე დავაანონსეთ 20-20 ლარით პენსიების ზრდა. ჩემს მიერ დასახელებული ციფრებით მარტივად მივიღებთ, რომ 700 ათას ადამიანზე ყოველწლიურად დაგვჭირდება 168 მილიონი ლარი. თუ გადავხედავთ საქართველოს აღმასრულებელ და საკანონმდებლო ხელისუფლებას, დაახლოებით 500 ადამიანი გამოდის, ეს გახლავთ ხელისუფლების მაღალი შტო და თუ ამას გავამრავლებთ, საშუალოდ 3 ათასიდან 5 ათას ლარამდე (როგორც მერყეობს ხელფასები), მივიღებთ დაახლოებით 30 მილიონ ლარს. აქედან გამომდინარე, საერთოდ რომ მთელი მთავრობა და საკანონმდებლო ორგანო უხელფასოდ დარჩეს, 1 ლარითაც კი ვერ მოვუმატებთ პენსიას. რასაკვირველია, ვეთანხმები იმ პოლიტიკას, რომ როდესაც ხალხს უჭირს, ხელფასები გონივრულ ფარგლებში უნდა გვქონდეს. სწორედ ამიტომ, მივიღეთ კანონი საჯარო მოხელეების ანაზღაურების შესახებ, რომელიც ითვალისწინებს რანგირებას, ასევე მოვაგვარეთ პრემია-დანამატების თემაც. გასაგებია, რომ ჩინოვნიკის მაღალი ხელფასი მოსახლეობას აღიზიანებს, მაგრამ აქვე ისიც უნდა გავითვალისწინოთ, რომ ხელისუფლებას ამ შემთხვევაში მაღალ კონკურენციას უწევს კერძო სექტორი, თუკი ჩვენ გვინდა, რომ ჩვენი მინისტრი იყოს პროფესიონალი, პატიოსანი, პატრიოტი და მაღალ ზნეობრივი, ასეთ მოხელეებს კერძო სექტორში მინიმუმ სამჯერ მეტი ხელფასი აქვთ, ამიტომ ხელისუფლება იძულებულია ჰქონდეს გარკვეული რაოდენობის ხელფასი კადრის შესანარჩუნებლად, – განაცხადა „კვირას“ პრესკლუბში გამართულ ბრიფინგზე ზაზა ხუციშვილმა.