“არასამთავრობოების ნაწილის მოთხოვნა თეა წულუკიანის გადადგომასთან დაკავშირებით, არც კორექტულია და არც დასაბუთებული”

დეპუტატმა ანრი ოხანაშვილმა, იუსტიციის მინისტრის გადადგომის მოთხოვნასთან დაკავშირებით, განაცხადა, რომ ეს არც კორექტულია და არც დასაბუთებული.
მისივე თქმით, აღნიშნული მოთხოვნა გაცდენილია იმ ჩარჩოს და იმ ფარგლებს, რაზეც შეიძლება არასამთავრობო ორგანიზაციები და ეს სექტორი საუბრობდეს.

„არასამთავრობო ორგანიზაციების ნაწილის მოთხოვნა, იუსტიციის მინისტრ თეა წულუკიანის გადადგომასთან დაკავშირებით, არც კორექტულია და არც დასაბუთებული. კანონმდებლობით განსაზღვრულია, რომ სწორედ იუსტიციის მინისტრი აწარმოებს მოლაპარაკებას, ფართო ჩართულობით, მთავარი პროკურორის შერჩევასთან დაკავშირებით. ვთქვით, რომ ფართო ჩართულობა იქნებოდა უზრუნველყოფილი და ასეც მიმდინარეობს პროცესი. შესაბამისად, თუ კანონმდებლობით დადგენილი მოთხოვნები სრულდება, მაშინ აღარ რჩება კითხვა, რას ითხოვენ, რა არის აქ პრობლემა“, – განაცხადა ანრი ოხანაშვილმა.

შეგახსენებთ, რომ ათამდე არასამთავრობო ორგანიზაციამ იუსტიციის მინისტრის, თეა წულუკიანის გადადგომა მოითხოვა. როგორც არასამთავრობოების წარმომადგენლებმა განაცხადეს, თუ თეა წულუკიანი არ გადადგება, მთავარი პროკურორობის კანდიდატის შერჩევის პროცესში არ ჩაერთვებიან.