„თითქოს იმის გამო, რომ ხალხი მოსაწევად გარეთ გადის, ამით ქართული სუფრის ტრადიციები ირღვევა და ვეღარ ხდება ქართული სუფრის ტრადიციების შენარჩუნება“, – ამის შესახებ პარლამენტის ჯანდაცვის კომიტეტის თავმჯდომარემ აკაკი ზოიძემ ჯანმრთელობის ხელშეწყობისა და პრევენციის სამეცნიერო-საკონსულტაციო საბჭოს სხდომაზე განაცხადა.
„იქამდეც მივედით, რომ ტრადიციების რღვევა დაგვაბრალეს. ჩვენ დიდი იმედი გვაქვს, რომ 2018 წლის 1 მაისიდან რეალურ გარდატეხას შევიტანთ ორი მიმართულებით – გადავარჩენთ იმ ადამიანების სიცოცხლეს, რომლებიც პასიური მოწევის შედეგად იღუპებიან და ასევე, ახალი თაობები აღარ ჩაერთვებიან მოწევაში, რადგან სპონსორობა და რეკლამირება აიკრძალა. სექტემბრიდან კი შემოვა პიქტოგრამები და გაფრთხილებები, რაც ასევე შეამცირებს ახალგაზრდების დაინტერესებას თამბაქოს პროდუქციით“, – განაცხადა აკაკი ზოიძემ.
დღეს ჯანმრთელობის ხელშეწყობისა და პრევენციის სამეცნიერო-საკონსულტაციო საბჭოს სხდომაზე თამბაქოს კონტროლის კანონმდებლობის შესრულების საკითხზე იმსჯელეს.