თბილისში, ძლიერი წვიმის გამო 01:00 საათის მონაცემებით 153 შეტყობინება შევიდა, შეტყობინებების ნაწილი კი ფიქტიური აღმოჩნდა. ამის შესახებ ინფორმაციას საგანგებო სიტუაციების მართვის სამსახური ავრცელებს.
ყველაზე მეტი შეტყობინება ფიქსირდება გლდანი-ნაძალადევის რაიონიდან. შეტყობინებები შევიდა ასევე: დიდუბე-ჩუღურეთის, ისანი-სამგორის და ვაკე-საბურთალოს რაიონებიდან.
საგანგებო სიტუაციების მართვის სამსახურის ცნობით, წყლის ძლიერმა ნაკადმა დააზიანა გლდანი-სოფელი გიორგიწმინდის დამაკავშირებელი გზა.
ვარკეთილის მიმდებარე ტერიტორიაზე რამდენიმე ხის წაქცევის გამო გზა ჩაიხერგა, ამ დროისთვის, გზა გაწმენდილია და შეფერხებები მოხსნილია.
ძლიერი წვიმის გამო თბილისში, ამაშუკელის ქუჩაზე მდებარე ერთ-ერთი საცხოვრებელი კორპუსიდან მოსახლეობის ევაკუაცია განხორციელდა.
ამის მიზეზი გახდა ის, რომ სანიაღვრე არხი წყლის დიდი ნაკადის გამო ჩაიხერგა, წყალი კი საცხოვრებელი კორპუსის მიწისქვეშა ავტოსადგომში შევარდა. ადგილზე მთელი ღამის განმავლობაში მუშაობდნენ საგანგებო სიტუაციების მართვისა და სამაშველო დახმარების სამსახურები. მათ შენობისკენ მიმავალ წყალს მიმართულება შეუცვალეს, დაგროვებული წყალი ამოტუმბეს და სანიაღვრე არხიც გაწმინდეს.
პირველადი დათვალიერებით კორპუსის საძირკველს საფრთხე არ ემუქრება. შემთხვევის შედეგად არავინ დაშავებულა. გვიან ღამით ადგილზე თბილისის მერის მოადგილე ირაკლი ბენდელიანი, ვაკის გამგებელი ნოდარ ტურძელაძე, საგანგებო სიტუაციების მართვისა და თბილსერვის ჯგუფის წარმომადგენლები იმყოფებოდნენ.