დაავადებათა კონტროლის ცენტრი მომატებულ ტემპერატურასთან დაკავშირებით საზოგადოებას რეკომენდაციებს აძლევს

ზაფხულის დადგომასთან და მომატებულ ტემპერატურასთან დაკავშირებით, დაავადებათა კონტროლის ეროვნული ცენტრის ხელმძღვანელის მოადგილემ, პაატა იმნაძემ ისაუბრა.
როგორც საგანგებო პრესკონფერენციაზე იმნაძემ აღნიშნა, მოსახლეობამ ყურადღება უნდა გაამახვილოს იმ გზავნილებზე, რომელსაც დაავადებათა კონტროლის ეროვნული ცენტრი გასცემს, რათა მოსახლეობამ ე.წ. სითბური ტალღის პირდაპირი ზემოქმედება აიცილოს თავიდან.
„დღეს უამრავი ადგილია ქალაქში, სადაც არის კონდინცირებული ჰაერი, ეს იქნება აფთიაქი, მაღაზია, უამრავი ადგილია. თუ ცუდად იგრძნობთ თავს, აუცილებლად შედით ასეთ ადგილას და გაგრილდით, რამდენიმე წუთით მაინც, რომ არ განგივითარდეთ სითბური შეტევა“,- განაცხადა პაატა იმნაძემ.
პაატა იმანაძე დიასახლისებს პროდუქტების სწორად შენახვისკენ მოუწოდა და რჩევის სახით აღნიშნა, რომ სასურველია, საკვების მაიონეზით შეკმაზვა სუფრასთან მიტანამდე რამდენიმე წუთით ადრე მოხდეს.
„როდესაც ცხელა, ყველაზე სახიფათო საკვები არის სალათი, მიაონეზითა და მწვანილით შეზავებული. შესაძლოა ეს მწვანილი ისე კარგად ვერ გარეცხო რომ რამე ბაქტერია არ დარჩეს ზედ, შესაძლოა მიიღო ეს საკვები და არაფერი არ დაგემართოს ერთი და ორი ბაქტერიით, მაგრამ იგივე ბაქტერია თუ მოხვდა სალათში და გარეთ არის 38 გრადუსი სიცხე, ეს მიკრობები ადვილად მრავლდებიან, ყოველ 20 წუთში ერთიდან ორი წარმოიშვება და გეომეტრიულად მრავლდება. ამიტომ პრინციპულად მნიშვნელოვანია, რომ ასეთი საკვების მიღების დროს შენახვის პირობები იყოს დაცული“, – განაცხადა პაატა იმნაძემ.
იმნაძემ ასევე, მოსახლეობას მწერებისგან თავის დაცვისკენ მოუწოდა, – „დღეს უკვე არის უამრავი საშუალება, სხვადასხვა დამაფრთხობლები კოღოებისთვის, ტკიპებისთვის და სხვადასხვა მწერისთვის. წაისვამ სხეულზე და დაცული იქნები მწერებისგან“.