ყოფილი დეპუტატი ვალერი გელაშვილი, მისი ცემის საქმეზე ექსპრეზიდენტ მიხეილ სააკაშვილის დამნაშავედ ცნობასთან დაკავშირებით, პირველ კომენტარს აკეთებს.
როგორც გელაშვილმა „კვირასთან“ საუბარში განაცხადა, ის ნაწილობრივ კმაყოფილია განაჩენით.
გელაშვილი თვლის, რომ სააკაშვილისთვის 6 წელზე მეტი უნდა მიესაჯათ.
„6 წელიწადი ცხადია ცოტაა, უფრო მეტი ეკუთვნოდა, მაგრამ ფაქტი, რომ განაჩენი დადგა და მიესაჯა სასჯელი, – ამით უკვე კმაყოფილი ვარ. ამასთან, გარკვეული პერიოდით თანამდებობის დაკავების უფლებაც ჩამოერთვა. თუმცა, მეორე მხარეა აღსრულება ანუ თუ შეძლებენ რეალურად მის დაკავებას“, – განუცხადა „კვირას“ ვალერი გელაშვილმა.
დეპუტატ ვალერი გელაშვილის ცემის საქმეზე, თბილისის საქალაქო სასამართლომ, საქართველოს ყოფილი პრეზიდენტი მიხეილ სააკაშვილი დამნაშავედ ცნო.
მოსამართლის გადაწყვეტილებით, საქართველოს ყოფილ პრეზიდენტს 6 წლით თავისუფლების აღკვეთა განესაზღვრა. მას ასევე ჩამოერთვა 2 წლითა და 3 თვით თანამდებობის დაკავების უფლებაც.
მიხეილ სააკაშვილს, ვალერი გელაშვილის ცემის საქმეზე, ბრალი 2014 წელს წაუყენეს.
„კვირა“