ოკუპირებული ტერიტორიებიდან დევნილთა, შრომის, ჯანდაცვისა და სოციალური დაცვის მინისტრობის კანდიდატი დავით სერგეენკო ამბობს, რომ ლტოლვილთა სამინისტროსა და ჯანდაცვის უწყების სტრუქტურული შერწყმის პროცესი უახლოეს 3 თვეში დასრულდება.
უწყებების გაერთიანებისა და სამომავლო საქმიანობის დეტალებზე მინისტრობის კანდიდატმა ჯანდაცვის, განათლებისა და სპორტის კომიტეტების გაერთიანებულ სხდომაზე ისაუბრა.
„ჩვენ უკვე გვქონდა ძალიან მჭიდრო და ინტენსიური კომუნიკაციები ჩვენს კოლეგებთან და ახლა უკვე ჩვენი სამინისტროს თანამშრომლებთან. არცერთი ის აქტივობა, რომელიც მიმდინარეობდა დევნილთა სამინისტროში, არ დაკნინდება. ვფიქრობ, რომ პირიქით, ის გადაკვეთები, რაც იყო ამ სამინისტროებში ძირითადად სოციალური და დასაქმების მიმართულებით, საშუალებას მოგვცემს, რომ გავაძლიეროთ ძალისხმევა და მივიღოთ უკეთესი შედეგები“, – განაცხადა დავით სერგეენკომ.
პარლამენტში გაერთიანებული კომიტეტების ორი სხდომა პარალელურ რეჟიმში გაიმართა. ერთზე ძალოვანი უწყების მომავალ ხელმძღვანელებს მოუსმინეს, მეორეზე ეკონომიკური გუნდის ახალ შემადგენლობას უსმენენ.
