“ნაციონალური მოძრაობა” პრეზიდენტისგან ბოდიშის მოხდასა და განმარტების გაკეთებას ითხოვს, თუ რატომ დაასახელა აჭარის მთავრობის თავმჯდომარის პოსტზე თორნიკე რიჟვაძის კანდიდატურა. პარტიის წევრების განცხადებით, პრეზიდენტმა ამ გადაწყვეტილებით შეურაცხყოფა მიაყენა უმაღლეს საბჭოსა და რეგიონის მოსახლეობას.
ნაციონალური მოძრაობის წევრები ვარაუდობენ რომ გიორგი მარგველაშვილი გარიგებაში შევიდა ბიძინა ივანიშვილთან.
პრეზიდენტმა თორნიკე რიჟვაძე აჭარის მთავრობის ხელმძღვანელის თანამდებობაზე წარადგინა. ის “ქართული ოცნების” კანდიდატია, ოპოზიციას კი საერთო კანდიდატი ჰყავდა დასახელებული არმაზ ახვლედიანის სახით.
იმისთვის რომ კანდიდატი აჭარის მთავრობის მეთაური გახდეს, აჭარის უმაღლესი საბჭოს 21 დეპუტატიდან 11-ის მხარდაჭერა სჭირდება. „ქართულ ოცნებას“ კი უმაღლეს საბჭოში 14 მანდატი აქვს.
თორნიკე რიჟვაძე „საქართველოს ენერგეტიკის განვითარების ფონდის“ ხელმძღვანელი იყო. მანამდე ენერგეტიკის მინისტრის მოადგილის თანამდებობასაც იკავებდა.
აჭარის ავტონომიური რესპუბლიკის მთავრობის თავმჯდომარემ ზურაბ პატარაძემ თანამდებობა 4 ივლისს დატოვა.