“მიშა სააკაშვილი და შალვა ნათელაშვილი, როგორც ერთი პოლიტიკური სხეული, ისე მოიაზრება”

შალვა ნათელაშვილი „ნაციონალური მოძრაობის“ კანდიდატია, – ამის შესახებ პარტია „მემარცხენე ალიანსის“ ლიდერმა სოსო შატბერაშვილმა მედიაჰოლდინგ “კვირას“ პრესკლუბში გამართულ პრესკონფერენციაზე განაცხადა.
მისი თქმით, შალვა ნათელაშვილს არ აქვს შანსი, გახდეს საქართველოს პრეზიდენტი.
„მიშა სააკაშვილი და შალვა ნათელაშვილი, როგორც ერთი პოლიტიკური სხეული, ისე მოიაზრება. ისინი სულიერი თანამოაზრეები და სულიერი ძმები არიან. ეს ბოლოდროინდელმა მოვლენებმა ცხადყო: რუსთაველის გამზირზე იმართებოდა შვილმკვდარი მამების მხარდამჭერი მიტინგი, თითქმის ნახევარი საქართველო მივიდა და გვერდით დაუდგა შვილმკვდარ მამებს.
როდესაც ეს მისია ხელში აიღო „ნაციონალურმა მოძრაობამ“ და მიტინგის მთავარსარდლად შალვა ნათელაშვილი დანიშნა, ხალხი დაფრთხა და გაიქცა. 1000 კაცი აღარ გამოვიდა, იმიტომ, რომ ნათელაშვილი და სააკაშვილი განიზიდავს ხალხს. რანაირად შეიძლება ნათელაშვილი გახდეს საქართველოს პრეზიდენტი, რაც არ უნდა ევედროს ხალხს, ერთხელ მაინც მანდეთ ქვეყანაო“- აღნიშნა შატბერაშვილმა.
შატბერაშვილმა განცხადება „ერთიანი დემოკრატიული მოძრაობის“ ლიდერთან, ნინო ბურჯანაძესთან დაკავშირებითაც გააკეთა.
„ნინო ბურჯანაძემ განაცხადა, შესაძლოა, ვიყარო კენჭი საქართველოს პრეზიდენტის პოსტზეო. ბურჯანაძე, რატომღაც, ასოცირდება პუტინთან შეხვედრებთან, მე ამაში ცუდს ვერაფერს ვხედავ. თუ პრეზიდენტი გახდა, დაუყოვნებლივ მოლაპარაკებას დაიწყებს პუტინთან და მე ამას მივესალმები. არა მგონია, ბურჯანაძემ შეძლოს პრეზიდენტის პოსტის დაკავება“– განაცხადა შატბერაშვილმა.
მისივე თქმით, თუ ბიძინა ივანიშვილი „ქართული ოცნების“ პრეზიდენტობის კანდიდატი გახდება, მას არჩევნებში გამარჯვების დიდი შანსი ექნება.
„ორიოდე დღის წინ, ნიკა გვარამიამ განაცხადა, იგეგმება ბიძინა ივანიშვილის და პუტინის შეხვედრა და ამისთვის ივანიშვილს სჭირდება პრეზიდენტის სტატუსიაო. ეს ირონიულად განაცხადა, ამ დროს მე ძალიან მესიამოვნა.
ჩემი აზრით, თუ „ქართული ოცნება“ პრეზიდენტობის კადიდატად დაასახელებს ივანიშვილს, ნამდვილად ბოლო მოეღება იმ ყბადაღებულ თემას, რასაც ჰქვია საქართველოში არაფორმალური მმართველობა. თუმცა, არაფორმალურ მმართველობაზე ყბედობა დამთავრდა მას შემდეგ, რაც ივანიშვილი დაბრუნდა პარტიის თავმჯდომარის პოსტზე. თუ ივანიშვილი კენჭს იყრის პრეზიდენტის პოსტზე, დიდი შანსი აქვს გამარჯვების. თუ ივანიშვილი პრეზიდენტის პოსტს დაიკავებს და პრეზიდენტის პოსტზე მოღვაწეობას დაიწყებს იმით, რომ შეხვდება რუსეთის პრეზიდენტს და შეასრულებს 2011-2012 წლებში გაკეთებულ დანაპირებს, რომ რუსეთთან ურთიერთობას მოაგვარებს „ქართული ოცნება“, ამას მივესალმები“- განაცხადა შატბერაშვილმა.
მისი თქმით, „მემარცხენე ალიანსს“ ჯერ არ მიუღია გადაწყვეტილება, რა ფორმით მიიღებს არჩევნებში მონაწილეობას.
„ვმართავთ კონსულტაციებს სხვადასხვა პარტიასთან. ჩვენ მივიღებთ მონაწილეობას საპრეზიდენტო არჩევნებში, ოღონდ რა ფორმით, ეს გადაწყვეტილი არ არის. მალე გადაწყდება, ან რომელიმე კანდიდატს დავუჭერთ მხარს, თუ დავინახეთ, რომ ღირსეული კანდიდატი იქნა დასახელებული, ან ჩვენ მოვიძიებთ პიროვნებას, რომელსაც დავუჭერთ მხარს“– განაცხადა შატბერაშვილმა.