ხმაური თბილისის საკრებულოს გაერთიანებული კომისიების სხდომაზე – სხდომის დაწყებისას, საკრებულოს უმრავლესობის წევრებმა ოპოზიციური ფრაქცია “ნაციონალური მოძრაობის” წევრები თბილისის მიწათსარგებლობის გენერალური გეგმის დოკუმენტის არასწორ ინტერპრეტაციაში დაადანაშაულეს. რევაზ სოხაძის განცხადებით, ოპოზიციამ ტელეკომპანია “რუსთავი 2”- ს არასწორი ინფორმაცია მიაწოდა, თითქოს, გენგეგმის დოკუმენტის მიღების შემდეგ, დედაქალაქში ცხოვრება გაძვირდება.
“ჩვენმა კოლეგებმა ან შეგნებულად მიაწოდეს არასწორი ინფორმაცია, ან იცრუეს, რომ გენერალური გეგმის მიღების შედეგად თბილისში ცხოვრება გაძვირდება, რადგან წყლის და გაზის ფასი მოიმატებს. ყველანი მომსწრე ვართ დემაგოგიური განცხადებების, მაგრამ ეს ყოველგვარ ზღვარს სცილდება და ყოვლად გაუგებარი თემა იყო. ტელევიზია საკმაოდ უხერხულ მდგომარეობაში ჩააგდეს, რადგან არაფრისგან თემის შექმნა, უხერხულია. ამ თემასთან დაკავშირებით გენგეგმაში რა ჩანაწერიც არსებობს, ეს ჩანაწერი 2009 წლის გენგეგმაშიც არსებობდა. გენგეგმა იძლევა რეკომენდაციას, რომ ყველა რესურსი წყლის და გაზის დაზოგვისკენ იყოს მიმართული”,– განაცხადა რევაზ სოხაძემ, რომელსაც”ნაციონალური მოძრაობის” წევრმა ირაკლი ნადირაძემ უპასუხა.
“გენგეგმა იძლევა რეკომენდაციას, რომ როცა ხელისუფლებაში მოვედით, არც წყალი იყო, არც გაზი, დენი გრაფიკით მიეწოდებოდა ქალაქს. ეს ჩანაწერი იყო იმიტომ, რომ როგორღაც თბილისს ეს შეზღუდვები თავიდან აეცილებინა. იმ შემთხვევაში, როცა საკონსტიტუციო უმრავლესობა გაქვთ პარლამენტში, ჩვენთვის ამ ჩანაწერის დატოვება მიუღებელია იმიტომ, რომ ეს შეიძლება გამოიყენოთ საფუძვლად, რომ საწარმოებს დაუწესოთ წყალზე და გაზზე ლიმიტები. თუ დღეს ეს საჭიროება აღარ არსებობს, ეს ჩანაწერი ამოვიღოთ”,– განაცხადა ნადირაძემ, რასაც დარბაზში ხმაური მოჰყვა.
ოპოზიციის განცხადებით, დედაქალაქის გენერალური გეგმის რეკომენდაციების მიხედვით, საწარმოებს წყლისა და ბუნებრივი აირის მოხმარებაზე ლიმიტი დაუწესდებათ, თუ დაწესებულ ლიმიტს გადაცდებიან, საჯარიმო ტარიფის გადახდა მოუწევთ. ოპოზიცია მიიჩნევს, რომ ეს ცვლილება მერიას საშუალებას აძლევს, ბიზნესი შეავიწროვოს და უფრო მეტი თანხის გადახდა აიძულოს.