„რა თქმა უნდა, ყველა ხარჯი უნდა იყოს გამჭირვალე, მითუმეტეს იმ სახელმწიფო პოლიტიკური თანამდებობის მქონე პირის, რომელსაც სახელმწიფოს მეთაური ჰქვია. რა თქმა უნდა, ყველა კაპიკი მის მიერ დახარჯული უნდა იყოს გამჭირვალე და ეს როგორც ყოფილ, ასევე მოქმედ და მომავალ პრეზიდენტებს ეხება“, – ამის შესახებ საპარლამენტო უმრავლესობის წევრმა დავით მათიკაშვილმა ტელეკომპანია „იმედის“ ეთერში განაცხადა. მათიკაშვილი მიიჩნევს, რომ პრეზიდენტი ვალდებულია, ყველა ხარჯი გაასაჯაროოს.
„როდესაც საუბარია თუნდაც ყოფილი პრეზიდენტის 9 მილიონ ლარიან საქმეზე, რომელიც თქვენ გახსოვთ, „კოსტიუმების საქმედ“ იყო შეკერილი, როგორც ამას თვითონ მარგველაშვილი მოიხსენიებდა და როგორ ცდილობდა ის და დღესაც ცდილობს, რომ დღის სინათლე არ ნახოს ამ ყველაფერმა, თუ რაში დაიხარჯა ის ძველი ხარჯები, სად გადაიხადა პრეზიდენტმა ამდენი ფული. სწორედ ანალოგიურს აკეთებს დღესაც, როდესაც ის არ ასაჯაროებს მის მიერ გაღებულ ხარჯებს.
პრეზიდენტი მარგველაშვილი არის ვალდებული საკუთარი ერის წინაშე, საკუთარი ამომრჩევლის წინაშე, ჩვენ ის მოგვწონს თუ არ მოგვწონს.
მე რომ გითხრათ, რომ ძალიან მწყინს ის, რომ მალე საპრეზიდენტო არჩევნები იქნება და ქვეყანას ახალი პრეზიდენტი ეყოლება, მოგატყუებთ. იმიტომ, რომ ეს ძალიან კარგია, მაგრამ, სანამ არის პრეზიდენტი და მერეც, სახელმწიფოს წინაშე და საკუთარი ერის წინაშე მან აუცილებლად პასუხი უნდა აგოს, აუცილებლად უნდა გვითხრას, სად წაიღო მან ის ფული, რომელიც, დიახ, ბიუჯეტიდან არის პრეზიდენტისთვის განკუთვნილი. ეს არის ისეთივე ნათელი როგორც ის, რომ ორჯერ ორი ოთხია, პრეზიდენტმა აუცილებლად უნდა გაასაჯაროვოს ყველა ხარჯი, ის უბრალოდ ვალდებულია რომ ეს გააკეთოს“, – განაცხადა მათიკაშვილმა.