პარლამენტის თავმჯდომარე ირაკლი კობახიძე პრეზიდენტ გიორგი მარგველაშვილს არაეთიკური გამონათქვამების გამო აკრიტიკებს და უზრდელობაშიც ადანაშაულებს. საქმე ეხება მარგველაშვილის განცხადებას, რომელშიც ის ამბობს, რომ “კურიოზი” იქნება თუ “ქართული ოცნება საპრეზიდენტო არჩევნებში უპარტიო კანდიდატს დაასახელებს”. ამ განცხადებას კობახიძემ “პალიტრის” ეთერში უპასუხა. ინფორმაციას სააგენტო “ინტერპრესნიუსი” ავრცელებს.
კობახიძის თქმით, გიორგი მარგველაშვილი ეთიკასთან მაინცდამაინც ვერ მეგობრობს. „რანაირად არის ეს კომიკური მოვლენა, როდესაც ყველაფერს რომ თავი დავანებოთ, ეს არის აპრობირებული პრაქტიკა განვითარებულ ქვეყნებში. ჩვენი ერთ-ერთი მთავარი მეგობარი გრიბაუსკაიტეც პრეზიდენტი თავის დროზე გახდა ასე – ის იყო დამოუკიდებელი კანდიდატი და მას მხარი დაუჭირა ლიტვის რესპუბლიკურმა პარტიამ, რომელიც იმ დროს ლიტვის მმართველი პარტია იყო. ეს არის აბსოლუტურად ნორმალური მოვლენა, როდესაც დამოუკიდებელ კანდიდატს მხარს უჭერს მმართველი პარტია და ამ დროს უზრუნველყოფილია ერთი მხრივ ის, რომ მმართველი პარტიის რესურსი არის სწორი მიმართულებით გამოყენებული და მეორე მხრივ ის, რომ პრეზიდენტად აირჩევა ის პირი, რომელსაც აქვს რესურსი გახდეს ზეპარტიული პრეზიდენტი. ჩვენც ვხელმძღვანელობთ ამ კრიტერიუმებით და კომიკური ამაში არაფერია, თუმცა პრეზიდენტ გიორგი მარგველაშვილს ხშირად ახასიათებს არაეთიკური გამონათქვამები, ის თავისი პირით თუ თანაშემწეების მეშვეობით არა მხოლოდ ეთიკის ნორმებს არღვევს ხშირად, არამედ უზრდელობაც არა ერთხელ მოგვისმენია პირადად მისი ან მისი თანაშემწეების მხრიდან. არასდროს ჩვენი მხრიდან არ კეთდებოდა უზრდელური ან შეურაცხმყოფელი განცხადებები. ჩვენი მხრიდან იყო მძაფრი კრიტიკა, მაგრამ არასდროს გადაგვიკვეთია ის ზღვრები, რომელიც დადგენილია ელემენტარული ეთიკის ნორმებით. ამის საპირისპიროდ, გიორგი მარგველაშვილი არა მხოლოდ ეთიკის ნორმებს არღვევდა, არამედ ის უზრდელობდა ხოლმე. გიორგი მარგველაშვილი საუბრობდა დავით ჭიჭინაძის ტერმინებით. როდესაც შენ უმრავლესობის წევრებს უწოდებ კომკავშირლებს და ა.შ. არ შეიძლება დახვიდე ამ დონეზე, როდესაც საქართველოს პრეზიდენტის სტატუსს ატარებ“, – აღნიშნა კობახიძემ.