პრემიერ-მინისტრი ნიდერლანდების სამეფოს ელჩს შეხვდა

საქართველოს პრემიერ-მინისტრი მამუკა ბახტაძე ნიდერლანდების სამეფოს საგანგებო და სრულუფლებიან ელჩს იოჰანეს დაუმას შეხვდა. 
მხარეებმა სხვადასხვა სფეროში, მათ შორის სავაჭრო-ეკონომიკური მიმართულებით ორი ქვეყნის თანამშრომლობაზე ისაუბრეს. „ყურადღება გამახვილდა საქართველოს მთავრობის მიერ დაგეგმილ რეფორმებზე, რომლებიც ინკლუზიური ეკონომიკური ზრდის ხელშეწყობას ისახავს მიზნად. ასევე დადებითად შეფასდა მცირე და საშუალო ბიზნესის განვითარებაზე ორიენტირებული ნაბიჯები. 
აღინიშნა, რომ ნიდერლანდების სამეფოდან საქართველოში მნიშვნელოვანი ინვესტიციები ხორციელდება, რასაც მთავრობა მიესალმება. საუბარი ასევე შეეხო განათლების სფეროში დაგეგმილ რეფორმებს და ამ მიმართულებით საქართველოსა და ნიდერლანდების სამეფოს შორის თანამშრომლობის გააქტიურებას“, – ნათქვამია პრესსამსახურის მიერ გავრცელებულ ინფორმაციაში.