საპარლამენტო ფრაქციის, „ქართული ოცნება – ძლიერი საქართველოსთვის“ თავმჯდომარე ბიძინა გეგიძემ, დედამიწის შემსწავლელ მეცნიერებათა ინსტიტუტისა და სეისმური მონიტორინგის ეროვნული ცენტრის ექსპერტებთან ერთად, ნინო ჟვანიას ქუჩასა და მის მიმდებარედ მიმდინარე მშენებლობები მოინახულა.
ჟვანიას ქუჩაზე ერთ-ერთი მაღალი რისკის შემცველი მშენებლობა ე.წ. პროკურორების კორპუსია, რომელიც მდინარე ვარაზის ხევის მეწყერსაშიშ ფერდზე შენდება.
ბიძინა გეგიძე შეხვდა მშენებელი კომპანიის – „ფორლაინსის“ წარმომადგენელს, რომლის თქმითაც, ამ კომპანიას აღნიშნული ობიექტი რამდენიმე თვის წინ გადაეცა და პროექტიც შეიცვალა. მშენებლის თქმით, გათვალისწინებულია საყრდენი კედლის აშენებაც. დაპირებისამებრ, აღნიშნული სამშენებლო კომპანია ფრაქციას წარუდგენს შეცვლილ პროექტს, რომელიც შეისწავლის რამდენად გათვალისწინებულია საყრდენი კედლის აშენების საკითხი და შეთანხმებულია თუ არა ახალი პროექტი თბილისის მერიის შესაბამის სამსახურებთან.
გარდა ამისა, ნინო ჟვანიას N88-ის მიმდებარედ, მდინარე ვარაზის ხევის მარცხენა ფერდზე დაწყებულია ახალი მშენებლობა – კლდე მოჭრილია, ინერტული მასალა კი დაახლოებით 200 მეტრის მოშორებით, მდინარის ჭალაშია ჩაყრილი. საკმაოდ ვრცელი ტერიტორია მომზადებულია ახალი მშენებლობებისთვის, რაც კატეგორიულად დაუშვებელია, ვინაიდან, მდინარის ჭალაში მშენებლობა აკრძალული უნდა იყოს საფრთხის მაღალი რისკის გამო. აღნიშნულ ტერიტორიაზე აშენებულია რამდენიმე ჭა, 1000 მმ-იანი კოლექტორი კი, რომელიც ჟვანიას ქუჩის უკვე განაშენიანებული ნაწილისთვისაც არასაკმარისი იყო და, როგორც ფრაქციის წარმომადგენლები, ასევე სეისმური მონიტორინგის ეროვნული ცენტრის ექსპერტები ითხოვდნენ დამატებითი კოლექტორის დამონტაჟებას, გაგრძელებულია 297 მეტრით. დამატებით მას მიუერთეს 4 ერთეული 1000 მმ-იანი დიამეტრის კოლექტორი, რაც ბევრად მაღალი რისკის წინაშე აყენებს ჟვანიას ქუჩისა და მის მიმდებარედ მცხოვრებ მოსახლეობას.
ფრაქცია „ქართული ოცნება – ძლიერი საქართველოსთვის“ შეისწავლის ე.წ. პროკურორების კორპუსის შეცვლილი პროექტის თავსებადობას, ასევე მდინარე ვარაზის ხევის მარცხენა ფერდზე ჩატარებული სამუშაოების ლეგიტიმურობას, შეთანხმებულია თუ არა აღნიშნული საკითხი თბილისის მერიასა და გარემოს დაცვის სააგენტოსთან.