ვფიქრობ, დავით უსუფაშვილმა თავის დონეს, რეალურ, ადამიანურ თუ პარტიულ წონას უნდა გადახედოს, ვიდრე სხვის შეფასებას დაიწყებს, – ასე ეხმაურება საქართველოს პარლამენტის ვიცე-სპიკერი გია ვოლსკი დავით უსუფაშვილის განცხადებას.
ვოლსკი ფიქრობს, რომ პრეზიდენტის უფლებამოსილებების შესახებ დავით უსუფაშვილს საზოგადოება შეცდომაში შეჰყავს.
„პრეზიდენტის უფლებამოსილებები განისაზღვრება კონსტიტუციით. საკონსტიტუციო ვალდებულებები არ არის ისეთი, როგორიც იყო ადრე, არ მართავს პრეზიდენტი ქვეყანასა და მთავრობას. ამაზეა საუბარი და ჩვენ არ გვინდა, საზოგადოებას გავუჩინოთ არასწორი მოლოდინი პრეზიდენტისადმი. რასაც უსუფაშვილი აცხადებს, არის საზოგადოების შეცდომაში შეყვანა. ჩვენ პრეზიდენტის ინსტიტუტს კი არ ვაკნინებთ, საზოგადოებას ზუსტ ინფორმაციას ვაწვდით იმის თაობაზე, რომ პრეზიდენტის უფლებამოსილებები არის წარმომადგენლობითი, საგანგებო მნიშვნელობის მქონე, მაგრამ არა სოციალურ-ეკონომიკური საკითხების გადამწყვეტი. ყველა ცდილობს, საზოგადოება შეცდომაში შეიყვანოს, მათ შორის აღმოცენდა დავით უსუფაშვილიც, ჩემდა სამწუხაროდ”, – აღნიშნა ვოლსკიმ.