ამერიკის პრეზიდენტის დონალდ ტრამპის მიერ აშშ-ს ეროვნული თავდაცვის ავტორიზაციის აქტზე ხელმოწერა ნათელი დადასტურება იმისა, რომ საქართველოს და ამერიკის შეერთებულ შტატებს შორის ურთიერთობა მართლაც რომ სტრატეგიული ხასიათისაა, – ამის შესახებ საქართველოს პრემიერ-მინისტრმა მამუკა ბახტაძემ მთავრობის სხდომის დაწყებამდე გამართულ პრესკონფერენციაზე განაცხადა.
როგორც ბახტაძემ აღნიშნა, საქართველოსთან დაკავშირებული საკითხები როგორც ორმხრივ, ასევე რეგიონულ კონტექსტში სულ უფრო მკაფიოდ არის წარმოჩენილი ამერიკის შეერთებული შტატების პოლიტიკურ დღის წესრიგში.
„რამდენიმე დღის წინ საქართველომ კიდევ ერთი უპრეცენდენტო მხარდაჭერა მიიღო ჩვენი სტრატეგიული პარტნიორისგან. ამერიკის პრეზიდენტის დონალდ ტრამპის მიერ აშშ-ს ეროვნული თავდაცვის ავტორიზაციის აქტზე ხელმოწერით ამერიკის შეერთებული შტატების მხრიდან საქართველოს მტკიცე მხარდაჭერა კიდევ ერთხელ დადასტურდა საკანონმდებლო და აღმასრულებელ დონეებზე. საყურადღებოა, რომ საქართველოსთან დაკავშირებული საკითხები როგორც ორმხრივ, ასევე რეგიონულ კონტექსტში სულ უფრო მკაფიოდ არის წარმოჩენილი ამერიკის შეერთებული შტატების პოლიტიკურ დღის წესრიგში. აშშ-ს ავტორიზაციის აქტი გამოირჩევა იმით, რომ მასში დაფიქსირებულია უმნიშვნელოვანესი ჩანაწერები საქართველოს ეროვნული ინტერესებისა და უსაფრთხოების, ასევე, რეგიონული უსაფრთხეობის მხარდაჭერის თვალსაზრისითაც.
განსაკუთრებით მნიშვნელოვანია, რომ საკანონმდებლო დონეზე კიდევ ერთხელ ფიქსირდება ნატოს ღია კარის პოლიტიკის, მათ შორის, საქართველოს ნატოში გაწევრიანების იდეის სრული მხარდაჭერა. კიდევ ერთხელ მსურს გადავუხადო დიდი მადლობა ამ მხარდაჭერისთვის ჩვენს სტრატეგიულ პარტნიორს. ეს არის კიდევ ერთი ნათელი დადასტურება იმისა, რომ საქართველოს და ამერიკის შეერთებულ შტატებს შორის ურთიერთობა მართლაც რომ სტრატეგიული ხასიათისაა“, – განაცხადა ბახტაძემ.
აშშ-ს პრეზიდენტმა დონალდ ტრამპმა ხელი მოაწერა 2019 წლის თავდაცვის ბიუჯეტის კანონს, რომელიც თავდაცვით საჭიროებებზე 716 მილიარდი აშშ დოლარის გამოყოფას ითვალისწინებს.
აღნიშნული დოკუმენტი ასევე ითვალისწინებს სამხედრო თანამშრომლობის განვითარებას საქართველოსა და უკრაინასთან. აშშ-ს 2019 წლის თავდაცვის ბიუჯეტი ასევე ითვალისწინებს საქართველოსთვის თავდაცვითი ლეტალური იარაღის მიწოდებას და საქართველოს ნატო-ში გაწევრიანების მხარდაჭერისთვის ზომების მიღებას.