ვალდის ზატლერსი: გიორგი მარგველაშვილი ერთ-ერთი რეალური საპრეზიდენტო კანდიდატი იქნებოდა, რომელიც ნამდვილად იმსახურებს ამ თანამდებობას

გიორგი მარგველაშვილი ერთ-ერთი რეალური საპრეზიდენტო კანდიდატი იქნებოდა, რომელიც ნამდვილად იმსახურებს ამ თანამდებობას, – ამის შესახებ ლატვიის ყოფილმა პრეზიდენტმა ვალდის ზატლერსმა გიორგი მარგველაშვილის გადაწყვეტილების შეფასებისას განაცხადა.
ვალდის ზატლერსის თქმით, გიორგი მარგველაშვილი წარმატებით ემსახურა საქართველოს.
“პირველ რიგში, მინდა მადლობა გადავუხადო საქართველოს პრეზიდენტს. ის არაჩვეულებრივი ადამიანია. შესაძლოა, ამ სიტუაციაში არ მოველოდი მის განცხადებას, თუმცა, ის ერთ-ერთი ნამდვილი კანდიდატი იქნებოდა, რომელიც რეალურად იმსახურებს ამ თანამდებობას. ის საქართველოს ნამდვილი პატრიოტი და ნამდვილად არაჩვეულებრივი ადამიანია. ის წარმატებით ემსახურა საქართველოს და განაგრძობს ქართველი ხალხის და სახელმწიფოს სამსახურს. გისურვებთ ყოველივე საუკეთესოს, ბატონო პრეზიდენტო, იმედია, ნათელი მომავალი გვექნება, როგორც ჩვენ, ასევე თითოეულ თქვენგანს”, – აღნიშნა ვალდის ზატლერსმა.
დღეს, გიორგი მარგველაშვილმა ვალდის ზატლერსთან ერთად საჯარო ლექცია გამართა პრეზიდენტის ადმინისტრაციაში, რომლის დასაწყისშიც საქართველოს პრეზიდენტმა საზოგადოებას საპრეზიდენტო არჩევნებში მონაწილეობასთან დაკავშირებული გადაწყვეტილება გააცნო და აღნიშნა, რომ საპრეზიდენტო არჩევნებში მონაწილეობის მიღებას აღარ აპირებს.